Sajettar il luf duai tuttina daventar pli simpel. Quai sch'i va tenor la cumissiun per ambient, planisaziun dal territori ed energia (UREK) dal cussegl dals chantuns. Uschia duai la derasaziun dal luf pudair vegnir franada preventivamain cun in'adattaziun da la lescha da chatscha. Ins duai pudair sajettar lufs era da moda preventiva, uschia sco ils capricorns. La cumissiun vul controllar pli fitg la derasaziun dal luf.
Creschientscha memia sperta chaschunia problems
Ils ultims 3 onns saja la populaziun dal luf sa dublegiada. Tenor la cumissiun è quai memia spert, uschia ch'ils problems cun ils lufs creschian era. Oravanttut en las regiuns da muntogna duain ins pudair agir pli svelt, communitgescha la cumissiun. Perquai ha la cumissiun decidì in'iniziativa parlamentara. Sco proxim sto la cumissiun UREK dal cussagl naziunal decider davart la proposta. Sche questa dat glisch verda, lura vegn elavurà in sboz per ina lescha che vegnis debattada en il parlament.
Pro Natura crititgescha l'agir
Pro Natura ha ditg sin dumonda dad RTR ch'ella n'è insumma betg d'accord cun la proposta da la cumissiun d'ambient dal cussegl dals chantuns. Tenor l'organisaziun d'ambient na resguarda la cumissiun betg la decisiun da la populaziun ch'haja ditg na a la revisiun da la lescha da chatscha la fin settember 2020. La regulaziun preventiva dal luf è vegnida refusada a l'urna da la populaziun. Dad uss vegnir cun quasi la medema proposta ch'era en votaziun saja ina decisiun a la svelta e malponderada.
L'emprim analisar las mesiras prendidas
Be avant curt ha il Cussegl federal adattà l' ordinaziun da la lescha da chatscha existenta. Quella lubescha ussa da sajettar pli svelt ils lufs. Tenor Pro Natura saja uss sco emprim dad analisar, tge effect che questa adattaziun ha gì, avant da decider ulteriuras mesiras. Il cumenzament da l'emna ha la Pro Natura annunzià da vulair entrar en dialog cun organisaziuns da l'agricultura e da las regiuns da muntogna per pudair guardar enavos sin la stad da quest onn ed uschia pudair chattar soluziuns cuminaivlas per la convivenza cun il luf.
