Dapi il 1970 è il dumber da bleras populaziuns sa reduci per passa dus terzs. Quai resulta dal Living Planet Report 2020 ch'il WWF ha edì ensemen cun la Societad zoologica da Londra.
Scienzads han intercurì ed observà bun 21'000 populaziuns da passa 4'400 spezias periclitadas e betg periclitadas. Tranter quellas animals lactants, utschels, peschs, amfibis e reptils. Insects n'èn betg vegnids quintads. Sa mussà èsi ch'il dumber tar las populaziuns examinadas è sa reducì en media per bunamain 70%. Il WWF discurra d'in nov record negativ e d'in signal ch'il sistem dal planet disdeschia plaunet dal tuttafatg.
Per evitar che anc dapli biodiversitad giaja a perder, sto la natira tenor il WWF vegnir protegida meglier. Tranter auter duai quai capitar cun betg runcar tant guaud e cun evitar il commerzi cun animals selvadis. Plinavant stoppia la producziun da vivonda vegnir pli persistenta ed ils umans stoppian ir enturn pli economic cun vivonda.
