Igl è stà ina relativamain clera chaussa. Votantas e votants svizzers èn s'exprimids en tuts chantuns per la «lètg per tuts». Il pli cler Gea hai dà en il chantun Basilea-Citad cun 74% da las vuschs, ma er en il chantun Turitg (69,1%) ed ils chantuns Lucerna e Berna è ina gronda maioritad s'exprimida per la midada da lescha. Il pli stretg èsi stà en ils chantuns Appenzell-Dadens (50,8%) e Tessin (52,9%).
Il Grischun di Gea
Er las votantas ed ils votants dal Grischun èn s'exprimids per la «lètg per tuts». Tenor il resultat final han 62,75% mess in Gea en l'urna.
Grischun: La lètg per tuts
Resultat
La maioritad da las vischnancas grischunas è per la «lètg per tuts». Sulettamain singulas vischnancas èn s'exprimidas cunter la midada da la lescha. Uschia per exempel la vischnanca da Furna, il Puschlav ni er Rossa e Buseno. Il pli cler gea a la lètg datti da Segl – quai cun 77,7% da las vuschs.
Per tge vai?
Fin uss dastgan pèrs omosexuals sulettamain laschar registrar lur relaziun sco partenadi registrà, la maridaglia n'è pero betg pussibla. La «lètg per tuts» avra la lètg er per pèrs omosexuals. Sper la lètg duain pèrs omosexuals er survegnir ils medems dretgs tar la famiglia.
Il Cussegl federal ed il parlament èn gia s'exprimids per la lètg per tuts: Pèrs omosexuals na duain betg pli vegnir tractads auter che pèrs eterosexuals, è lur argumentaziun. Tut ils pèrs duain dastgar maridar ed uschia er survegnir ils medems dretgs e las medemas obligaziuns.