Ladina Heimgartner è naschida e creschida si a Scuol en l'Engiadina Bassa. Propi gronda è ella dentant vegnida en il mund da las medias. Sia carriera sa scriva sco in cudesch: cumenzà sco redactura durant il studi tar il Bündner Tagblatt, midà tar RTR e surpiglià zunt svelt incumbensas da manar.
Jau hai fatg bler or da naìvitad, gia tar mia emprima plazza da manar tar RTR hai jau pensà, quai tuna interessant – far! Sche jau avess savì tge che spetga...
Cun maniera interessada saja ella vegnida vinavant in pèr giadas fin tar la plazza da la directura da RTR. «Là hai jau savì tge che spetga sin mai», di Ladina Heimgartner ch'è stada sis onns directura da RTR. Durant quest temp è ella era stada vicedirectura da la SRG SSR ed uschia engaschada en il cumbat cunter l'iniziativa da «No Billag».
Esser scheffa en il mund da medias
Ladina Heimgartner fa blers patratgs co ella duai vegnir recepida extern ubain er intern. «Il pli gugent autentica. Jau vi dentant era vegnir vesida sco persuna ch'è cumpetenta, perquai ch'ella lavura fitg bler per quai.»
«Jau sun cuntenta d'esser qua», di Ladina Heimgartner ch'ha midà avant quatter onns tar la Ringier SA. Là è ella CEO da Ringier Medias Svizra e maina enturn 1'000 collavuraturas e collavuraturs. Il medem mument sesa ella en la direcziun da la Ringier SA. Stentus saja il cumbat per las finanzas: «Nus faschain relativamain bler bain ed endretg, da l'autra vart èsi mintga di in cumbat per mintga rap.» La branscha da medias saja en in temp fitg turbulent. L'internet haja midà tut ed era l'intelligenza artifiziala saja da persequitar fitg bain.
Tar las ediziuns stampadas da Ringier Medias Svizra tutgan gasettas sco il Blick, Beobachter, Bilanz, Schweizer Illustrierte, Landliebe, Glückspost e bleras autras.
Prima dunna en il nov post
Fin da matg è Ladina Heimgartner vegnida elegida a Kopenhagen sco presidenta da l'Uniun mundiala dals editurs e da las edituras da gasettas. «L'applaus cura che nus avain ditg che quai saja l'emprima giada ch'ina dunna saja en questa funcziun – quest applaus era impressiunant. Quai ha anc adina uschè ina forza», raquinta Ladina Heimgartner. Insumma sajan las reacziuns stadas fitg positivas. Ella sa legria da s'engaschar per in schurnalissem internaziunal.
