Ils delegads e las delegadas da l'Uniun mundiala dals editurs e da las edituras da gasettas han elegì Ladina Heimgartner sco nova presidenta. La CEO da las medias Ringier Svizra succedia al Spagnol Fernando de Yarza Lopez-Madrazo, ch'aveva presidià l'uniun ils sis onns passads, scriva la plattafurma persoenlich.com. L'Uniun mundiala dals editurs e da las edituras da gasettas è l'organisaziun professiunala da las interpresas da medias privatas. Sia incumbensa è da proteger ils dretgs da schurnalistas, editurs e d'interpresas da medias sin tut il mund e da s'engaschar per bunas cundiziuns da basa per il schurnalissem independent.
3'000 interpresas, 18'000 publicaziuns
L'organisaziun è activa en 120 pajais e represchenta ils interess da 3'000 interpresas da medias cun passa 18'000 publicaziuns. Dapi che l'uniun è vegnida fundada l'onn 1948 promova ella la collavuraziun internaziunala tranter editurs ed interpresas da medias, decida standards da qualitad per la branscha da medias e s'engascha per la libertad da pressa.
En ses pled suenter si'elecziun ha Heimgartner discurì da las grondas sfidas dal schurnalissem sin tut il mund e da l'impurtanza da prender per mauns a moda communabla quellas. L'Uniun mundiala dals editurs e da las edituras da gasettas porschia ina rait globala e gidia las interpresas da medias d'avair success e da restar innovativ en in mund digital che sa midia a moda rasanta. Quai saja essenzial per che las medias possian realisar lur rolla impurtanta en la societad.
Ladina Heimgartner ha era lavurà 13 onns per SRG SSR, tranter auter è ella stada sis onns directura da RTR.