Igl è mesemna en damaun. Ordadora plovi e sufli – ma en l'apoteca Giacometti a Cuira èsi chaud e cumadaivel. Jau vegn beneventada e manada en ina pitschna stanza davos la teca. Cun mai en la stanza èn Fabienne Grether, assistenta da farma, e Priska Heinz, la responsabla da l'apoteca.
Jau sun m'annunziada en l'apoteca Giacometti per far in test d'allergia. Priska Heinz declera, tge allergias che quai test po tut mussar. Ella ma declera ch'els testeschan en l'apoteca Giacometti sin differents pollens, giats, chauns e bulieus.
L’assistenta da farma Fabienne Grether ma dumonda, tge che mes sintoms èn. Jau ditg ad ella ch'jau stoppia durant la stad mintgatant starnidar pli savens, e che mes egls mordan lura mintgatant. Fabienne Grether prepara il test. Ella ma dat in cor chaud per stgaudar ils mauns. Lura prepara ella ina pitschna guglia, in pflaster ed in med da dischinfectar.
Tegnai en maun quest cor chaud, per ch'il sang giaja in pau meglier.
Cura ch'ella ha rimnà tut las infurmaziuns ch'ella dovra, prenda ella enta maun la pitschna guglia. «Uss datti ina pitschna furada», di Fabienne Grether. Avant ch’jau poss sentir la dolur, è la furada gia passada. Ella prenda mes sang ord la pipetta ed al svida en l'uschenumnada «cassetta».
Sin maisa davant nus ha Fabienne Grether preparà in'uschenumnada cassetta. La cassetta, u il test d'allergias, sumeglia fitg ad in test da corona. El è era alv ed ord plastic. Da las varts èn malegiads plirs stritgs nairs. Sper ils stritgs stattan cumbinaziuns da cifras e bustabs che na ma dian nagut – g6, e1, t3.
Entant ch’il test lavura, ma declera Fabienne Grether pli precis las differentas allergias. Para ch’i po era dar reacziuns da crusch – damai ch’ins reagescha allergic sin insatge ch’ins n’è atgnamain betg allergic. Suenter 20 minutas è il test a fin. Mes resultat è vesaivel mo fitg fin, ma tuttina valaivel. Tar mai hai dà in stritg cotschen tar l’ensaina g6 – quai che stat per l’uschenumnà «Lischgras». Mes test è pia positiv. Quai munta ch'jau hai propi in'allergia da pollen.
La gronda part da la glieud è allergica sin ervas.
Priska Heinz n'è betg surstada da mes resultat. La gronda part da la glieud saja numnadamain allergica sin ervas. 20% da la populaziun svizra patescha d'ina allergia da pollen. Da quels è la fitg gronda part allergica sin ervas - uschia sco jau - numnadamain 70% dad els.
Sch'in test d'allergia mussa in u plirs stritgs cotschens, lura vul quai dir ch'ins ha anticorpuls en il sang - pia ch'ins è allergic. Sch'ins sa quai, pon ins evitar quests pollens. Priska Heinz ma recumonda da mai laschar avert l'entira notg la fanestra. Ultra da quai di ella a mai ch'jau duai lavar la saira mes chavels avant ch'jau vom a letg.
In pau surstada sun jau schont che jau hai in'allergia da pollen, schegea che jau avess pudì spetgar quai, uschè savens sco jau stoss sturnidar la stad.
Priska Heinz e Fabienne Grether m’accumpognan or da la chombra pitschna e ma dattan ina conferma da mia allergia. Questa allergia cunter «Lieschgras» poss jau anc acceptar. Cura che jau bandun l’apoteca, sun jau simplamain leda ch’i n’ha betg dà in stritg cotschen tar l’ensaina da «giat».