En ses atelier a Lucerna lavuran bleras persunas creativas che lavuran independentamain. Igl è ina cuminanza che parta il lieu, dentant era ils barats e las discussiuns en quest lieu sajan fitg impurtantas, di Cilgia Zangger durant nossa visita. Atgnamain pudess ella era lavurar a chasa, dentant saja quella structura en atelier fitg impurtanta per ella.
Cilgia Zangger è creschida si a Silvaplauna, ha fatg il gimnasi ed è lura sa decidida da studegiar illustraziun. Quella decisiun ha manà ella a Lucerna, e là è ella restada. Las emprimas emnas a Lucerna sajan stadas diras, ella laschavia encrescher per l'Enginadina. Oz dentant, suenter set onns, è quai sa midà. Sin il pli durant il Chalandamarz è l'encreschadetgna puspè qua.
Sias illustraziuns èn lavurs sin empustaziun. Il client ubain la clienta trametta in text, in'istorgia u er in giavisch per in flyer ed ella cumenza a far patratgs. En in barat vi e nà èsi lura da chattar tge giavischs e tge pussaivladads ch'èn dadas.
L'ultima paraula rumantscha che la Chasa Editura ha edì ha ella illustrà. La paraula dal Gion Chavrer è vegnida preschentada als Dis da litteratura a Domat. Ina lavur ch'ella haja fatg fitg gugent. Gia l'onn passà aveva ella preschentà als Dis da litteratura ina da sias lavurs. Lura era quai stà illustraziuns per la litteratura cun il tema sex. Questas illustraziuns sajan schon stadas ina sfida da far, dentant era fitg interessant. Insumma survegn la dunna da 26 onns fitg savens lavurs or da la Rumantschia. Quai saja fitg bel, cunzunt era perquai ch'ella possia uschia er adina restar en contact cun la lingua rumantscha ed il Grischun.
