Commembers da l’armada e da la protecziun civila han prestà var 620’000 dis da servetsch durant la pandemia da corona. Il mardi fineschan er ils davos commembers da l’armada lur engaschi, ordinà dal Cussegl federal.
50 commembers da l’armada e policists militars che sustegnevan l’Administraziun federala da duana, han pudì finir il mardi lur incumbensas. Quai scriva l’armada svizra. Uschia è l’engaschi d’assistenza «Corona 20» a la fin suenter 107 dis.
Armada e protecziun civila
Commembers da l’armada han prestà en questa perioda var 320’000 dis da servetsch. Igl è stà la pli gronda mobilisaziun dal militar dapi la Segunda Guerra mundiala. E la protecziun civila è stada activa en tut ils 26 chantuns – ed ha fatg la finala bun 300’000 dis da servetsch. Profità ha cunzunt il sectur da sanadad.
