Tut en tut hajan ins survegnì 60 dumondas per sustegn da l'armada. 12 chantuns hajan dumandà per agid, communitgescha l'armada. Tar quels tutga era il chantun Grischun.
Ils schuldads sustegnan il sectur da sanadad, la logistica ed ils fatgs da transport. Fin ussa èn vegnids mobilisads 5 battagliuns d'ospital e 5 cumpagnias da sanitad. La mobilisaziun funcziunia bain, professiunal e spert, conferma l'armada. Dus terzs dals schuldads clamads sajan entant entrads en servetsch. I sa tracta da la pli gronda mobilisaziun da l'armada dapi la segunda guerra mundiala. Cifras exactas numna l'armada dentant betg. En l'entira Armada svizra datti il mument 10 persunas ch'èn s'infectadas cun il coronavirus.