Perquai fai star stut ch'i vegn gist uss ina nova iniziativa. Quella pretenda ch'il luf perda il status da protecziun. L'iniziativa pretenda era ch'il luf po vegnir sajettà tut onn. Quai duai valair dapertut cun excepziun dal Parc Naziunal Svizzer.
Or da la Bassa
L’iniziativa na vegn betg dal Grischun ubain dal Vallais sco ch'ins pudess sminar, mabain da la Svizra Centrala. La pura da chavals, ponis e vatgas mamma, Miriam Grab, ha lantschà l’iniziativa. Igl era dentant difficil da chattar persunas per il comité, di la pura dad Unterägeri en il chantun Zug. Er sche blers eran interessants, na vulevan els betg che lur num vegnia publitgà, declera ella.
Suenter ch'igl ha dà in stgarp en vischinanza, hai savì ch'igl è uss il mument ch'il luf è era arrivà en la Bassa.
Las midadas da la lescha che il parlament ha decidì van a la gruppa memia pauc enavant. Oravant disturba ils iniziantas ed iniziants ch'il luf resta vinavant protegì. In’emprova dal Cussegl federal da schluccar il status da protecziun n’era betg reussida. La convenziun da Berna, a quella che la Svizra fa part, ha refusà la dumonda il november.
Miriam Grab è optimistica che l’iniziativa ha success. Quai er sche nagina organisaziun gronda stat davos l’iniziativa.
Uniun purila betg activa
Uschia declera Markus Ritter envers RTR ch’el haja gronda chapientscha per las iniziantas ed ils iniziants. Il squitsch sin puras e purs en chaussa luf saja numnadamain grond. Dentant sajan uss las ordinaziuns en lavur e l’Uniun purila svizra sa participescha vi da la elavuraziun da quellas. Perquai na sustegnia l’uniun l’iniziativa activamain, declera Markus Ritter.
Surstada da l’iniziativa
Tut surpraisa cura ch’ella ha udì da l’iniziativa era Ursula Schneider-Schüttel da la Pro Natura. Tenor ella han las organisaziuns da natira stuì far il pli grond cumpromiss en chaussa ed han er desistì a favur da quel cumpromiss d’in referendum envers las midadas. Ch’i vegn uss ina tala iniziativa fetschia surstar.
A chatscha da suttascripziuns
L’inizianta Miriam Grab na lascha betg prender il curaschi er sch'i mancan organisaziuns grondas davos l’iniziativa. «Per nus quintan las singulas persunas, là vulain nus ir per las suttascripziuns.», di ella. E da ramassar quellas ha ella anc temp fin il november 2024.