Suenter che tut ils chantuns han dumbrà las vuschs din 58,2% Gea a l'iniziativa per ina 13avla renta e 41,8% Na. In cler Gea datti cunzunt da la Svizra franzosa e taliana. Là han fin ad 80% acceptà ella. Era en il Grischun han bunamain 52% acceptà l'iniziativa. In Na hai dà en Svizra Centrala ed en ils dus chantuns dad Appenzell. La participaziun svizra è tar passa 58%.
Cun quai survegnan persunas pensiunadas probabel a partir da l'onn 2026 ina renta supplementara, quai che munta in augment da quella da 8,3%. Anc betg decidì è co la 13avla renta duai vegnir finanziada. Il Parlament federal sto elavurar ina proposta.
Iniziativa per ina 13avla renta
Svizra: Iniziativa dal pievel «Viver meglier en la pensiun» (iniziativa per ina 13avla renta da la AVS)
-
GEA
1'883'465 Vuschs
-
NA
1'350'257 Vuschs
Vuschs dals chantuns
- GEA
- Na
Participaziun auta
La participaziun svizra a la votaziun è auta cun passa 58%. Sch'ins guarda sin la media svizra dals ultims onns è quai fitg aut. En la grafica suandanta cumpiglia il 2024 las cifras da questas duas votaziuns da l'AVS.
Baume-Schneider: «Las votantas ed ils votants han dà in cler signal»
Il Cussegl federal haja prendì per enconuschientscha omadus resultats da votaziuns. Quai ha la cussegliera federala Elisabeth Baume-Schneider ditg la dumengia suenter las votaziuns. Il signal saja cler. La populaziun giavischia ina AVS cun ina segirada sociala ferma. L'AVS vegnia stimada fitg da la populaziun, ha Baume-Schneider ditg vinavant.
Reacziuns da las partidas
- Partida socialdemocratica: Per la PS saja quest Gea ina victoria per la populaziun, uschia ha ditg la co-presidenta Mattea Meyer. La partida pretenda ina svelta adattaziun. Entras questa 13avla renta vegnia la vita dals pensiunads futurs a sa meglierar. Quest Gea saja er ina incumbensa al parlament da proteger la capacitad da cumpra da la populaziun cun mesiras concretas, scriva la partida vinavant. Suenter onns da privilegis da taglia per concerns gronds, stoppia la maioritad burgaisa chapir che la populaziun saja uss vidlunder.
- Partida verd-liberala: La partida verd-liberala na vesa anc betg ina meglieraziun da la renta entras questa 13avla renta. La partida è stada cunter l'iniziativa. Pir cura che la refurma da la prevenziun professiunala vegnia a pudair meglierar las rentas per persunas che lavuran parzialmain. Era questa furma da lavur stoppia pudair profitar dal model da las trais pitgas.
- Allianza dal Center: Era sche l’AdC è stada cunter la 13avla renta, accepta ella il resultat. Ella vul dentant ch’il squitsch resta bass tar la classa mesauna. Cunquai che las iniziantas ed iniziants han laschà avert danunder che quests daners supplementars duessan vegnir, spetga la partida che cunzunt famiglias giuvnas ed educaturas sulettas vegnan a patir sut quest squitsch supplementar.
- Partida liberaldemocratica: la PLD deplorescha il Gea a la 13avla renta. La ministra da l’intern Elisabeth Baume-Schneider pretenda ina revisiun structurala da l’AVS. La Svizra stettia cun ina finanziaziun nunsegira avant ina ruina finanzpolitica. Ils sanesters portian la responsabladad per quest manever, scriva la partida vinavant. La partida na saja betg pli pronta dad augmentar la taglia per che l’AVS na crodia betg en las cifras cotschnas. La sanestra stoppia uss mussar co ch'ella veglia finanziar quai cun resguardar il frain da daivets.
- Partida populara svizra: La PPS deplorescha questa decisiun. La consequenza da quai saja ina rusna finanziala da tschintg milliardas francs. E pajar stoppia la classa mesauna, scriva la partida vinavant. Perquai refusa la PPS tut las reducziuns da paja u pertschients da la taglia sin la plivalur. Ils custs supplementars da la 13avla renta stoppian vegnir cumpensadas entras spargnar. Là vesa la PPS potenzial tar ils fatgs d’asil, la cooperaziun al svilup e l’agid a l’Ucraina.
En il Grischun vegn l'iniziativa acceptada stgars
La maioritad da las Grischunas ed ils Grischuns ha acceptà l'iniziativa - quai dentant stgars cun 51,71% encunter 48,29%. La participaziun grischuna è medemamain pulit auta cun 56,35%.
Bler sustegn per l'iniziativa datti cunzunt en las valladas talianas che han ditg bunamain tuttas Gea, auter ch'il Puschlav e la Bregaglia. En la Surselva di la gronda part Na a l'iniziativa. Il Grischun Central e l'ulteriur Grischun din tendenzialmain plitost Gea a l'iniziativa. En l'Engiadin'Ota refusa bunamain mintga vischnanca l'iniziativa, auter che Bever. Ed en l'Engiadina Bassa din er be duas vischnancas Gea (Scuol e la Val Müstair) – tut tschellas tramettan l'iniziativa da l'aua giu.
