Ils babs han mess sin palpiri trais variantas. Ina per ina canorta rumantscha, ina per integrar ina gruppa rumantscha en ina canorta gia existenta ed ina per ina termagliera. Per la varianta dad ina canorta rumantscha duvrassi radund 30 uffants, per ina gruppa rumantscha en ina canorta existenta in zichel pli paucs.
Entant hajan els ensemen 10 uffants, ha declerà Remo Pfister, oriund da Breil. Sur medias socialas, sur uniuns rumantschas a Turitg e sur propaganda a bucca emprovan els ussa da rabitschar ensemen anc dapli uffants.
Urari ambizius
Gia il principi da l'onn 2016 duai ina varianta vegnir realisada ed averta. Quai saja bain in plan ambizius, di Remo Pfister. Els hajan dentant sa mess sapientivamain sut squitsch – era or da motivs egoistics. Ils 7 uffants dals 5 babs avessan numnadamain ussa il basegn dad ina canorta e betg pir en intgins onns.