I dat plirs indizis per cancer dal sain – ils blers da quels pon mo in medi u ina media constattar, ma tschertins pon ins era sentir sezza. Martina Maranta è schefmedia en l'ospital da dunnas Fontana a Cuira e fa controllas dal sain.
La controlla vesa or uschia che Martina Maranta palpa il sain da la persuna e tschertga indizis sin cancer dal sain. Mintgatant vesa ella ils segns gia avant ch’ella tutga insumma la persuna, ma per il solit chatt’ins tumors cun sentir els.
Sch'ins fa la controlla tar sasez èsi impurtant ch'ins na fetschia betg quai avant la perioda – lura è il sain fitg sensibel. Badar baud ils segns saja fitg impurtant, di ella.
Quei pon ins s’imaginar sco ina dira nusch sut la pel u ina chastogna dira – sch'ins senta quai en il pèz, duess ins ir tar in medi.
En il Grischun constattesch'ins en media tar 120 dunnas ad onn cancer dal sain, en Svizra èn quai 6'000 diagnosas. Er umens èn pertutgads - var 50 umens survegnan mintg' onn en Svizra la diagnosa da cancer dal sain. Quatter da tschintg umens pertutgads han 60 onns u dapli, cu els survegnan la diagnosa. Quai vuless la media Martina Maranta midar – e quai fa ella cun infurmar uschè bain sco pussaivel davart la tematica.
Or da l'archiv: