Anc sajan 167 letgs sin las staziuns intensivas libers, ha ditg il delegà dal Cussegl federal per il servetsch sanitar coordinà Andreas Stettbacher. 23 ospitals en Svizra n’hajan dentant nagins letgs intensivs certifitgads libers pli.
Tenor la taskforce federala pudess la limita critica da 400 pazients intensivs vegnir surpassada anc quest december, sch’il trend tar ils cas da corona na sa mida betg bainprest. Il commember da la taskforce Urs Karrer ha manegià – ch’els hajan dubis giustifitgads che las novas restricziuns tanschian per che las infecziuns da corona na creschian betg pli a moda exponenziala.
Pauc dinamica tar il vaccinar
Il dumber da las persunas vaccinadas creschia mo plaunet, ha ditg avant las medias Virginie Masserey dal BAG. Ils chantuns mettian bain a disposiziun pussaivladads per sa laschar vaccinar, quellas vegnian dentant er duvradas il mument per survegnir la terza dosa.
Virginie Masserey ha vitiers accentuà, che dapli persunas betg vaccinadas arrivian en ils ospitals che glieud cun la protecziun.
Tar persunas vaccinadas cumplainamain è il ristg da sa tschentar en l’ospital pli pitschen, s’augmenta dentant cun la vegliadetgna.
Novs placats dal BAG
Cun reglas e cun sa laschar testar possian ins tegnair sut controlla la pandemia, ed evitar ch’autras persunas vegnan en privel, ha agiuntà Virginie Masserey. Plinavant ha ella preschentà la nova campagna da la Confederaziun – che duai sensibilisar la populaziun da sa tegnair vid las mesiras da corona. Il fund è oransch e duai muntar: La situaziun è seriusa.
