Questa dumonda vegn adina pli impurtanta perquai ch'i dat adina dapli bains purils che bajegian ora lur stizuns ed era uschiglio datti adina dapli da questas stizuns, savens containers, nua che nagin lavura, mabain nua ch'ins dovra mo pli ina app da telefonin. Sco savens en Svizra dependa quai da chantun a chantun.
Il pli nov exempel vegn dal chantun Lucerna. Il departament da giustia dal chantun ha refusà ad ina stizun la lubientscha da avair avert 24 uras. Quai pervia da la lescha davart las uras d'avertura da stizuns che na lubeschia betg d’avair avert di e notg.
Stizun – en quai cas forsa betg gist la dretga definiziun, sa tracti gea atgnamain dad in pign container amez la citad en il qual nagin avess lavurà. La clientella avess avert la porta cun in'app sin il telefonin, avessan sez scannà ils products giavischads e lura era gist pajà a moda electronica las cumpras. Mo tenor il departament da giustia na giaja quai betg. La raschun: Il container haja ina porta che saja serrada e perquai valia quel sco stizun normala. I valian perquai ils temps d'avertura normals.
Tema en il parlament a Lucerna
Absurd, manegia Ursula Berset. Ella sesa per la partida verd-liberala en il parlament chantunal ed ha immediat inoltrà ina moziun. Ella pretenda che stizuns che n’han nagin persunal na duain betg esser suttamessas a la lescha davart il temp d’avertura.
Sustegn giauda la moziun da dretg enfin sanester. Betg il davos era perquai che sche la lescha vegn applitgada a moda stricta stuessan era numerusas stizuns sin bains purils che funcziuneschan sumegliantamain era serrar lur portas la notg e l'entira dumengia.
Talas dumondas na datti il mument betg mo a Lucerna mabain en praticamain tut las regiuns da la Svizra. En adina dapli lieus procuran questas novas stizuns per dumondas giuridicas e quai che pertutga las uras d'avertura èn quellas regladas da chantun tar chantun different.
Per exempel en Turgovia. Era là stuessan bleras stizuns sin ils bains purils atgnamain esser serradas la dumengia di Daniel Wessner, il schef da l’Uffizi d'economia e lavur dal chantun.
Sco stizun definin nus in local sch’ins po entrar e sch’igl è pussaivel da serrar il local.
Era la citad da Basilea enconuschevia ina tala restricziun stricta, di Michael Mauerhofer da l’Uffizi d'economia e lavur da la metropola al Rain. Mo cura ch'adina dapli dumondas per lubientschas sajan vegnidas hajan els sentì ch'ins stoppia anc ina giada reponderar la chaussa.
La regenza ha perquai decidì d’adattar l’ordinaziun perquai che questas stizuns da 24 uras èn in basegn da las Basilaisas e dals Basilais.
Dapi november è la revisiun en vigur. Ed en il Grischun? Qua è la situaziun in zic in'auta. En il Grischun na dettia numnadamain nagina lescha chantunala che definescha ils temps d'avertura da las stizuns, di Gian Reto Caduff, il manader da l’Uffizi d'industria, mastergn e lavur.
Nus avain ina lescha chantunala davart ils dis da ruaus e quella di che las uras d’avertura èn regladas sin nivel da las vischnancas. Perquai n’è quai era betg en il sectur da cumpetenza da noss uffizi. Nus essan per lura pertutgads sche persunas èn emploiadas ordaifer las uras usitadas e quai n’è betg il cas qua.
En il Grischun decidan pia las vischnancas davart las uras d'avertura da las stizuns. E tschertas han era gia gì da sa fatschentar cun dumondas per ina stizun da 24 uras. L’onn passà ha per exempel l'interpresa Spar installà dus containers da cumpra, in a Rueras ed in a Surava. Omadus na datti dentant betg pli. Malgrà la pussaivladad da far cumissiuns di e notg han memia paucas persunas fatg diever da l'offerta. Mo i dat era tschels exempels. Uschia a Vignogn, Andiast ed a Vuorz. Quellas stizuns paran d'ademplir in basegn da la populaziun. Forsa era perquai ch'ellas èn durant almain intginas uras l'emna occupadas.
