Ella viva quasi senza inimis en il Lai da Constanza, e quai dapi otg onns – la conchiglia quagga. Quests animals èn vegnids da l'Ucraina tar nus en Svizra. Scienziads crain ch'els sajan vegnids en Svizra a travers cun bartgas, fin al Lai da Constanza.
Piet Spaak da l'Institut federal per provediment, serenaziun e protecziun da las auas EAWAG a Dübendorf maina il project «Seewandel», in project communabel da tuts trais pajais enturn il Lai da Constanza. El di, che la conchiglia saja sa derasada sco in'explosiun – e che quai giaja vinavant uschia.
Per il mument chattain nus tar ils pli frequents lieus fin 30'000 conchiglias quagga per meter quadrat.
Ina femella possia ad onn producir fin in milliun ovs, di el – e mastgels anc bler dapli sperma. Uschia sa multiplitgeschan els spert.
Il problem d'ina spezia invasiva saja, ch'ella midia l'ecosistem en il lai. Quai fa ella cun midar la qualitad da l'aua, di Piet Spaak. L'aua saja «terriblamain clera», quai che signifitga, che l'aua n'ha naginas substanzas nutritivas per auters animals pli. Vitiers vegn, che las conchiglias quagga han in talent da surviver.
Perscrutaders han mess las conchiglias en ina frestgera, en il stgir, senza nutriment e senza nagut. Suenter in onn han els puspè prendì ora ellas, ed ellas na moran betg!
L'influenza da las conchiglias quagga sentan er ils pestgaders – els han difficultads da tschiffar avunda peschs. Perquai ch'i dat damain nutriment en l'aua, datti adina pli paucs peschs. Ultra da quai èn las raits plain conchiglias quagga. Quest problem enconuscha era Reto Leuch, pestgader da terza generaziun. Prender tut las magnuccas or da la rait giaja pli ditg che prender or ils peschs, di el.
Gia avant che las conchiglias eran en il Lai da Constanza, avevan ils pestgaders problems. Saja quai concurrenza tranter ils peschs u il nutriment en il lai ch'è sa reducì.
Jau na fatsch naginas prognosas uschè pessimisticas – i vegn adina ad avair peschs en il lai, da quai sun jau persvadì.
Tema da perder sia lavur, perquai che las conchiglias pudessan in di occupar l'entir lai tenor ils scientists, n'ha el betg. El è persvadì, ch'i vegn adina a dar peschs en il lai. La vita en il lai vegn simplamain a s'adattar a la situaziun, di Reto Leuch. Quai saja stà tuttina tar ses bab, che ha tschiffà tut auters peschs durant sia carriera che Reto Leuch ussa.
