En ils guauds da las corporaziuns Altdorf, Sisikon e Flüelen crescha tranter las plantas indigenas adina pli savens da quai che na tutga betg en la cuntrada. Per exempel palmas da la fortuna u er arbajas-tscharescha che creschan surtut en l'Asia. En ils guauds svizzers stgatschan talas sorts las plantas indigenas, quai ch’è in problem, declera Alexander Imhof, il schef da l’Uffizi d'ambient dal chantun Uri.
Tar nus è il guaud in guaud da protecziun. El na porscha uschia era betg avunda vivonda per ils animals che vivan en il guaud e lez è lura era main attractivs sco lieu da recreaziun.
Derasadas vegnan quellas plantas invasivas, uschenumnadas neofitas, da curtins privats. Bleras da quellas plantas chattan ins numnadamain anc adina en las butias. Per far frunt a l'invasiun estra han las trais corporaziuns ussa laschà vegnir endament in'acziun speziala.
Tgi che ha en ses curtin ina u pliras da quellas plantas, chaglias ubain fluras privlusas po s'annunziar tar il lavuratori forestal Urnersee. Lura vegn quella remplazzada gratuitamain cun ina planta indigena. E tgi che veglia possia er anc gist profitar dad ina cussegliaziun, di Alexander Imhof.
Uschia pon ins era garantir che quellas plantas che vegnan plantadas creschan lura era bain e che quellas ch’ins prenda ora vegnan era dismessas correct.
Quai saja in punct fitg impurtant. Uschiglio possia schabegiar che las plantas estras fetschian anc dapli problems perquai ch’ellas derasan vinavant lur sems.
