La pandemia da corona ha tutgà fermamain ils kinos ed il public n’ha anc adina betg chattà la via enavos en las salas da projecziun. Quai constatescha era Max Glénat, che maina in kino a Sierre. Ad el fa l'entira situaziun quitads. «Nus essan fitg, fitg lunsch davent da las cifras che nus avevan anc il 2019. 50, 60 pertschient.» E quai sentian els natiralmain era en la cassa. Quella digren haja pliras raschuns, di Max Glénat.
Jau crai las disas da consumar, las plattafurmas da streaming e forsa ha la glieud era tema da vegnir ensemen en las salas da kino.
Per el vegn l'acziun dal chantun Vallais che cuzza enfin Nadal perquai al dretg mument. Mardi, mesemna e gievgia pon ils amaturs ir gratuitamain a guardar films en ils 13 kinos dal chantun. Uschia duain las Vallesanas ed ils Vallesans puspè survegnir gust dad ir a kino. E nagut auter veglian els, di Max Glénat.
Sustegn per la litteratura vallesana
Entrada libra durant trais dis l’emna en ils kinos chantunals n’è dentant betg la suletta mesira dal pachet da sustegn per la cultura indigena che la regenza vallesana ha preschentà. Per mintga cudesch che vegn cumprà en ina libraria independenta datti in cudesch gratuit dad in'autura ni dad in autur vallesan ni cun ina stretga relaziun cun il chantun muntagnard. Ina buna chaussa, di Pierre-André Milhit, il president da l'uniun da las auturas e dals auturs dal Vallais
Ils auturs vallesans han patì perquai che las librarias eran in temp serradas. I n’ha era betg pli dà exposiziuns ni occurrenzas publicas nua ch’ins pudeva preschentar cudeschs. Quai è ina buna chaussa che gida tuts.
Quai vesa era la possessura da la libraria «La Liseuse» a Sion, Françoise Berclaz, uschia. «Nus essan tuts solitaris. L’entira branscha da litteratura vegn a profitar da quai. E la fin finala profitescha era il lectur che vegn en libraria.» Sco terz element dal program da sustegn ha la regenza vallesana decidì d'augmentar per 60’000 francs il preventiv per las quatter artotecas chantunalas, nua ch'ins po emprestar graficas, maletgs e fotografias gratuitamain.
Cun tut quellas mesiras spera il chantun da puspè dar schlantsch a la vita culturala el Vallais, di il schef da l’uffizi da cultura, Alain Dubois.
La finamira è che la glieud scuvra puspè la litteratura vallesana e turnia en ils kinos. Quai è bain mo in sustegn punctual, mo per mai èsi propi impurtant che nus collavurian cun ils differents acturs, per etablir quella mesira a lunga vista.
Finanziadas vegnan las mesiras cun daners ch'il chantun ha reservà per agids da corona ed or d'il budget normal. In'evaluaziun a la fin da l'acziun duai lura mussar tge effect che las mesiras da sustegn han propi gì.