Sch'i va per l'aua da baiver ha la citad da Basilea in grond avantatg. Perquai che uschè ditg ch'i dettia anc aua en il Rain, na vegn Basilea betg ad avair in problem pli grond cun l'aua, di Reto Müller, pledader da medias da l'IWB, las ovras industrialas da Basilea, ch’èn responsablas per il provediment d'aua dal chantun.
Aua dal Rain per populaziun e plantas
L'aua ord il Rain vegn purifitgada ed uschia transfurmada en aua da baiver per la populaziun da la chapitala en il nordvest. Il mument sajan quai enfin in meter cubic aua mintga secunda ch'els tirian ord il flum, quai che correspundia a 1'000 liters. Quai tunia forsa suenter da bler, consequenzas negativas n’haja quai dentant strusch, di Reto Müller.
Il mument maina il Rain probabel circa 400 meters cubics aua per secunda. Quai è pia ina pitschna part da tut l’aua che curra dal Rain giu.
Avund'aua da baiver pia per l'entira populaziun da Basilea ed era avund'aua per plantas e parcs. Ch'ils ortulans da la citad dovran blera aua da baiver per lur lavur entant che quella è en autras regiuns stgarsa fatschenta era Emanuel Trueb, il schefortulan da Basilea. Da duvrar aua direct dal Rain na vegnia dentant betg en dumonda. Gist era perquai ch'era uffants termaglian gugent cun ils uders ed indriz da bagnar e traguttian mintgatant era aua.
Mo era l’orticultura da Basilea fa patratgs co adattar il sistem da sauar a la midada dal clima. L'idea: automatisar l'entir sistem e gestiunar quel tras in sistem automatic, di Trueb.
La finamira è che nus pudain sauar ina gronda part da nossas surfatschas uschia ch’i dat il dretg mument la dretga quantitad d’aua en il dretg lieu.
Nov test cun indriz automatic
In emprim test han els gia fatg, quai sin ina surfatscha pli pitschna en in parc. Els hajan era gia eliminà intginas flaivlezzas dal sistem. Ussa saja perquai il dretg mument da testar il sistem sin ina surfatscha pli gronda, en il Schützenmattpark datiers dal curtin zoologic.
La finamira a lunga vista saja dentant da na betg mo sauar a moda automatica, mabain era a moda intelligenta. Funcziunar duai quai grazia a sensurs en il terren che mesiran l'umiditad ed era grazia in sistem d'intelligenza artifiziala ch'è collià cun l’internet ed analisescha per exempel la previsiun da l'aura. Uschia duai esser pussaivel che sch’ils sensurs mussan setgira ch’il sistem na saua betg perquai che la previsiun da l’aura mussa ch’i vegn a dar in urizi, di Trueb vinavant.
I dovra ina midada da tenuta
Con blera aua ch'ins vegn a spargnar saja anc grev da dir. Ils tests cuntinueschian ed i giaja schon anc intgins onns enfin che tut ils sistems da sauar vegnan colliads cun il program, di Emanuel Trueb. I dovria la fin finala era anc ina midada da tenuta tar els sez, aschunta el.
Las ortulanas ed il ortulans èn scolads per sauar persunalmain las plantas, da guardar sche la planta è sauna u betg. Da surlaschar questa responsabladad ad ina maschina è per bleras collegas anc fitg grev.
Ch'era els stoppian dentant s’adattar mussan betg il davos las undas da chalira da l'ultim temp. Era sche la citad da Basilea ha grazia il Rain, almain il mument, anc avunda aua, èsi segir prudent da duvrar mo uschè blera aua sco propi necessari.