Avant las medias a Berna ha il cusseglier federal Ignazio Cassis condemnà fermamain las attatgas sin la populaziun civila en la citad datiers da la chapitala ucranaisa Kiev. Ils maletgs da las victimas assassinadas hajan schoccà el ed el n’haja mai pensà da vesair tals maletgs en l’Europa dal 21avel tschientaner. Ignazio Cassis ha era reagì sin la critica da partidas ed autras organisaziuns che la Confederaziun n’haja betg condemnà la Russia a moda clera pervia dals malfatgs a Butscha che sajan crims cunter l’umanitad. La diplomazia stoppia salvar sang fraid e sco emprim laschar verifitgar ils fatgs, ha Cassis ditg.
La Svizra haja immediat pretendì in’inquisiziun internaziunala dals schabetgs e vegnia era a sustegnair questas lavurs a moda finanziala e persunala. Sche l’UE decidia novas sancziuns vegnia la Svizra a surprender quellas, ha Cassis accentuà.