Tut saja en preparaziun per che la Svizra possia surpigliar las novas sancziuns cunter la Russia ed il Belarus che l'Uniun Europeica ha relaschà. L'embargo sin ieli russ vegn introducì en l'Europa pass per pass enfin il cumenzament 2023. Il Cussegl federal ha dentant er incaricà ils departaments d'economia, da finanzas e d'energia da sclerir las consequenzas per la Svizra.
Plinavant relascha il Cussegl federal sancziuns finanzialas e restricziuns da viadi per ulteriuras circa 100 persunas. I sa tracta da persunas da l'armada russa ch'èn responsablas per la mazzacra da Butscha, da persunas engaschadas en politica e propaganda e da parentella dad oligarchs russ.
1600 schuldada a Lugano
Il Cussegl federal ha plinavant declerà sco «eveniment extraordinari» la conferenza per l'Ucraina ch'ha lieu ils 4 e 5 da fanadur a Lugano. La conferenza ch'ha en il focus la reconstrucziun da l'Ucraina haja lieu en in ambient ed ina situaziun cun bleras tensiuns internaziunalas, uschia ch'ella dovria mesiras da segirtad extendidas, communitgescha il Cussegl federal. Concret munta quai che la Confederaziun surpiglia 80% dals custs daldispositiv da segirtad, che las polizias federalas e chantunalas fan part e ch'i dat in contingent da fin a 1600 schuldada en servetsch subsidiar.
A la conferenza s'inscuntran politichers e diplomats da radund 40 stadis e 20 organisaziuns che la Svizra è tenor dretg internaziunal obligada da proteger. La direcziun generala per il dispositiv da segirtad sutastat vinavant al chantun Tessin – concret a la polizia chantunala tessinaisa. En collavuraziun cun differents uffizis per segirtad da l'administraziun federala vegn la situaziun valitada danov cuntinuadamain ed adattà il dispositiv. Era il spazi aviatic vegn observà e restrenschì.
