In urizi vehement cun granella e ferma plievgia è sa muventà sur ils chantuns Lucerna e Sviz en direcziun Svizra orientala. La polizia ha survegnì passa 400 cloms d'agid nua ch'i gieva per aua en tschalers, auals sur las rias sco era vias inundadas u bloccadas.
Sulet en il chantun Sviz hai dà tranter las 12:30 e las 14:45 200 cloms d'urgenza, ha communitgà la polizia chantunala. En plirs lieus eran ils pumpiers en acziun ed er ils emploiads da l'uffizi da construcziun bassa han gÌ da far ils mauns plains. Vitiers eran plirs trajects da viafier interruts.
Cella da granella
Dumengia enturn mezdi è sa furmada la cella da granella sur l'Emmental e l'Entlebuch. Sco emprim ha questa cella purtà ferma plievgia sin il Napf cun 24 mm aifer in'ura. Dal Napf è la cella sa muventada en direcziun Lucerna. Tar la staziun sin l'Allmend han ins mesirà 22 mm en in'ura, uschia scriva SRF Meteo. La polizia chantunala da Lucerna ha survegnì passa 210 cloms d'agid. 19 corps da pumpiers èn stads en acziun. Pertutgads il pli fitg èn las vischnancas da Werthenstein, Wolhusen, Ruswil, Neuenkirch ed era la citad da Lucerna. Annunzias davart persunas blessadas na datti naginas.
Suenter ina curta fasa pli flaivla è la cella sa rinforzada sin ses viadi envers nordost en la regiun dal Lai da Zug. Sper granella hai dà ferma plievgia. A Benken/SZ hai dà aifer mes'ura 34 mm plievgia ed a Lachen radund 40 mm. I ha dà impediments da traffic pli gronds. La lingia da viafier da la SBB da Turitg a Cuira è stada interrutta in mument tranter Pfäffikon SZ e Ziegelbrücke. Davart ulteriurs donna n'ha datti anc naginas indicaziuns.
Dapi la sonda suentermezdid hai dà ferms urizis sur parts da la Svizra ed han purtà ferma plievgia e granella. L'emprim èn ils urizis stads en l'ost da la Svizra, pli tard en il Giura e per lung las Prealps dal vest a l'ost.
Per tadlar curt e concis:
