Gottard - Viafier federala quinta puspè cun manaschi limità il 2024

Il tren ch'è svià ils 10 d'avust en il tunnel da basa dal Gottard vegn probablamain ad esser allontanà cumplettamain pir la fin da settember. Fin ch'ils donns en il tunnel sajan reparads vegnia quai a durar plirs mais, han declerà las Viafiers federalas mesemna.

Avant stgars in mais è in tren da vitgira svià 15 kilometers suenter l'entrada en il tunnel dal Gottard. Ina part dal tren è vegnida sin il segund binari dal tunnel ed è collia cun in tunnel che separescha ils dus tunnels da viafier. Ils donns sajan immens tenor il manader da l'infrastructura da las Viafiers federalas Peter Kummer.

Las reparaturas cuzzan anc ditg

Malgrà che set dis l'emna ein fatschentadas enfin 50 persunas en il tunnel vest cun lavurs da rumida, è la destrucziun avant lieu anc adina gronda. Dals vaguns sviai èn vinavant otg en il tunnel. Els ein vegnids bittads or dals binaris, stuschads ensemen u sdrappads in or da l'auter. Per allontanar ils vaguns, vegnan els tagliads en tocca.

L'accident è probablamain capità pervia d'ina roda donnegiada. Avant ch'il tren è svià, ha el donnegià sin ina lunghezza da set kilometers il vial. Fin 20'000 palas da betun ston vegnir remplazzadas. Las cundiziuns da lavurar en il tunnel èn fitg schlettas, l'aria è stippa e las temperaturas per part sur 40 grads.

Manaschi limità puspè en il 2024

Fin cha tut ils vaguns èn allontanads or dal tunnel da basa po quai esser la fin da settember. Lura na vegnan però anc nagins trens pudair circular tras il tunnel dal vest. Emprim sto il vial puspè vegnir construids e duas stgomias vegnir remplazzadas. Cun in manaschi limità quinta la Viafier federala puspè en il 2024.

En il tunnel dal ost circuleschan puspè trens da vitgira dapi ils 23 d'avust. Trens per persunas curseschan or da motivs da segirezza tras il vegl Scheiteltunnel.