Tunnel da basa Gottard - SBB Cargo sto pajar

Il transportader da vitgira stoppia pajar ils custs ch’in accident chaschunia. E quai saja en quest cas la SBB Cargo. La figlia da l'SBB saja uschia responsabla per il manaschi segir e stoppia prender las mesiras correspundentas. Ella haja da controllar ils vaguns avant la partenza ed haja uschia da star bun. Eventualmain vegnia il vagun cun la roda rutta da la Germania. Tar la dumonda da responsabladad na gioghia quai però nagina rolla.

Accident dals 10 d'avust

L'accident è capità ils 10 d'avust, sin la vart tessinaisa dal tunnel en il post multifuncziunal da Faido. Sco la Polizia chantunala dal Tessin communitgescha, sajan plirs vaguns siglids or da las rodaglias. Intgins chars hajan gì chargià material privlus, n'hajan dentant pers nagina chargia. Persunas blessads n'hai er betg dà.

In tren da vitgira cun radund 30 vaguns era da viadi cun radund 100 kilometers per ura, quai haja producì enormas forzas tar l'accident. Ils binaris ed ina porta da segirtad sajan vegnids donnegiads.