Las autoritads tessinaisas vulan mantegnair mesiras pli severas cunter il coronavirus. Quai malgrà che la Confederaziun schlucca tschertas mesiras a partir da glindesdi. La regenza dal Tessin haja tramess ina dumonda cun questa finamira al Cussegl federal, rapportan medias tessinaisas.
Las autoritads dal chantun dal sid vulan prolungar las mesiras anc fin ils 3 da matg. Quai era sche tschertas mesiras vegnan schluccadas en l’entira Svizra a partir da glindesdi. La regenza tessinaisa ha, tranter auter, decis restricziuns per plazzals e manaschis da l’industria.
Plinavant ston las persunas sur 65 onns resguardar restricziuns pli severas – sch’ellas vulan ir ord chasa. La raschun per quai è, ch’il Tessin è fitg ferm pertutgà da la pandemia da corona. Il Cussegl federal pudess anc oz decider davart la dumonda dal Tessin.
