La situaziun sin las staziuns intensivas saja il mument bein anc stabila, ha ditg Virgine Masserey da l'Uffizi federal per sanadad (BAG) avant las medias a Berna. Damai che las cifras d'infecziun creschian puspè ed il dumber da vaccinaziuns saja cun var 13'000 dosas l'emna passada plitost bass, possia quai sa midar svelt.
Actualmain sajan be gist trais quarts da la populaziun pli veglia che 12 onns vaccinada cumplainamain cunter il coronavirus. Quai na tanschia betg. Cun differentas calculaziuns ha Masserey fatg attent sin l'effectivitad da la vaccinaziun. Quella protegia vinavant en ils pli blers cas da grevs decurs da la malsogna. Tar persunas en la vegliadetgna da 60 fin 69 onns saja quai d'observar en 93 da 100 cas. Tar persunas sur 80 onns possia la vaccinaziun impedir in'ospitalisaziun en 84 da 100 cas.
Il vaccin da Johnson e Johnson ch'è lubì en Svizra dapi l'october n'haja fin ussa betg gì l'effect giavischà sin las cifras da vaccinaziun. Al cumenzament hajan ins sperà che quel porschia in'alternativa per blera glieud ch'è sceptica envers ils vaccins da mRNA. Quai na paria però betg d'esser il cas, uschia Virgine Masserey. Tenor il BAG sajan vegnidas duvradas fin ussa gnanc 22'000 dosas dal vaccin.
L'emna che vegn ha lieu l'emna da vaccinaziun naziunala cun diversas acziuns organisadas dals chantuns e vischnancas. La finamira saja d'esser uschè da manaivel a la glieud sco pussaivel. Davart las purschidas en il Grischun infurmescha l'uffizi da sanadad mesemna.
