L’anteriur schef da la banca Raiffeisen, Pierin Vincenz, ha gudagnà dapli che fin uss enconuschent. Quai rapporta la «NZZ am Sonntag» che sa basa sin documents en connex cun la procedura d’inquisiziun cunter l’anteriur schef. Tenor quai haja Vincenz gudagnà il 2008 13,8 milliuns francs. Er ils onns avant haja el per part gudagnà plirs milliuns, uschia la gasetta vinavant. Per reglar ils pajaments da la direcziun a moda discreta, haja ella duvrà in conto d’in advocat extern.
Pajas transparentas a partir dal 2009
A partir dal 2009 ha la banca fatg transparent las pajas da la direcziun. Ellas èn dapi lura adina stadas sut dus milliuns francs. Vincenz sez ha adina puspè crititgà ils «excess da paja» tar autras bancas. El è stà CEO da la banca Raiffeisen dal 1999 enfin il 2015. Envers la gasetta n’haja el betg prendì posiziun.
L’entschatta da l’auter onn stat Pierin Vincenz davant dretgira pervi d’execuziun d'affars malfidaivla.
Ord l'archiv