En ina enquista survegn il sistem da scolaziun svizzer bler laud. Trais quarts da las persunas dumandadas èn cuntentas cun il sistem. E bun dus terzs han inditgà, d'esser cuntents cun la lavur da la magistraglia.
La presidenta da l'uniun da scolastas e scolasts Dagmar Rösler ha ditg envers SRF: «Quai è in resultat surprendent, e mussa che nus avain sustegn or da la populaziun.»
La retschertga ha l'institut GFS Berna fatg sin incumbensa da SRG/SSR. Respundì han radund 57'000 persunas en l'entira Svizra.
Concret mussa la retschertga per exempel ch'i vegn apprezià ch'ins sa tscherner tranter ina scolaziun professiunala ed il gimnasi. I dat dentant er critica, ch'il sistem na preparia betg sin la vita suenter la scola. Quai han 40% da las persunas dumandadas consentì.
Preparar sin la vita suenter la scola
Per Dagmar Rösler n'èsi betg cler, tge che quai muntia per la scola. «Vai per preparar meglier sin il temp da lavur? U co che duvrar ed ir enturn cun medias? Quai han las scolas atgnamain gia sin il program. 60% da las persunas crai er, che las scolas na fan avunda cunter mobbing.
Er geniturs vegnian crititgads da las persunas dumandadas. 90% crain ch'uschenumnads geniturs da helicopter fetschian donn a lur uffants, per exempel sch'els cloman advocats u advocatas. Tenor Rösler dettia quai tip da geniturs. Quella part saja dentant ina minoritad, la gronda part sustegnia las scolas.
Il resultat da l'enquista precis: Trais quarts da las persunas èn cuntentas, u plitost cuntentas. La cuntentientscha è in pau pli aut en la Svizra dal Vest, ed en il Tessin.
En l'enquista renconuschan blers er, che las scolastas ed ils scolasts èn sut squitsch en lur lavur. Quai vegnia da las autas pretaisas envers la magistraglia.
