L'energia che po vegnir producida en Svizra durant in onn, tanschia mo per il consum durant 102 dis en Svizra. Per quest'onn muntass quai ch'i tanschess be pli fin ils 12 d'avrigl. Per il rest da l'onn dependess la Svizra dad imports da l'exteriur fin la fin da l'onn, scriva la «Fundaziun svizra per energia» SES.
SES pretenda augment d'energia regenerabla
La Svizra producescha pia bun 25% da l'energia ch'ella dovra en in onn. Il rest – tranter auter ieli, gas ed uran, ston vegnir importà e transportà sur grondas distanzas. Per quels imports impunda la Svizra mintg'onn radund 10 milliardas francs. Cun las midadas sin il sectur da l'energia haja la Svizra ussa la schanza da vegnir damain dependenta da l'energia importada, di la SES e pretenda dal Cussegl federal in program per augmentar la cumpart da las energias regenerablas.
Il pli independent en l'Europa: L'Islanda
Il stadi il pli independent da l'Europa puncto energia è l'Islanda. Ella producescha sezza radund 90% da l'energia ch'ella dovra.
