Heinz Brand na daventa betg pli aut Svizzer
La PPS n'ha fatg part da nagina coaliziun da glistas. Per Heinz Brand è l'allianza sanestra daventada memia ferma ed el ha pers ses sez.
Duri Campell perda il sez da la PBD
Quai che diversas retschertgas han mussà è daventà realitad. Il burgaisdemocrat Duri Campell n'ha betg pudì defender ses sez en il Cussegl naziunal. Sco el di, n'haja la PBD betg dumagnà da far da chapir a la populaziun la politica da mez da la PBD.
La culpa na vul Campell dar a nagin. I dettia ina perdita per sia partida. Tge che fetschia speranza a Duri Campell, saja la partida giuvna. Lezza haja cuntanschì in fitg bun resultat. Quai dettia speranza per l'entira PBD. El sez haja fatg tut quai ch'el haja pudì.
Colliaziuns da glistas èn stadas decisivas
A Heinz Brand ha surtut la colliaziun da glista da la PS, dals verdliberals e da la Verda fatg in stritg tras il quint. Quella colliaziun ha fatg en tut 3'000 vuschs dapli che las glistas da la PPS. Surtut la citad da Cuira ha fatg ina gronda differenza. Ils votants da Cuira han dà var 17'000 vuschs a l'allianza dal clima. Quai èn 5'000 dapli che per la partida dretga.
Duri Campell è vegnì frenà da la colliaziun da glistas dal center. Campell ha cun sias passa 10'000 vuschs, bain dapli vuschs che tut ils candidats da la PLD, ma en la summa han ils liberaldemocrats fatg dapli. Be sin la glista principala da la PLD han gia quatter da tschintg candidats fatg varga 6'000 vuschs. Ensemen cun las trais autras glistas da la partida fan els la finala bunamain 13'000 vuschs dapli che la Partida burgais-democratica.
RTR elecziuns 2019