Ils temas da la Partida evangelica da la Svizra (PEV)
- La PEV è ina partida fundada en il cristianissem che sa lascha diriger dals princips da l'evangeli en sias activitads politicas.
- Ella s'engascha per rinforzar la lètg e las famiglias ch'èn per la PEV il center da la societad. La partida pretenda tranter auter dapli supplements per uffants e per scolaziun sco er models flexibels da temp da lavur e dapli plazzas parzialas.
- Impurtanta è per ella da promover la protecziun dal clima. Ella vul promover la biodiversitad e pretenda ch'ins cuntanschia la finamira netto-nulla en connex cun las emissiuns da gas cun effect da serra.
- Plinavant s'engascha la EVP per in'economia responsabla senza explotaziun ed è s'obligada da cumbatter la paupradad.
La partida populara evangelica sa participescha per l’emprima giada a las elecziuns per il Cussegl naziunal. Ella vegn ad absolver las elecziuns dals 22 d'october 2023 senza ina colliaziun da glistas.
Ils temas da l'Uniun democratica federala
- La UDF politisescha tenor atgna descripziun sin basa da valurs biblicas. Ella refusa las interrupziuns da la gravidanza, l'assistenza al suicidi, la pornografia e la medischina da reproducziun. Ella vul proteger la lètg e lètg per tuttas e tuts.
- En quai che reguarda la politica sociala vul la UDF rinforzar l'atgna responsabladad, l'agid social duai vegnir reducì ad in minimum. Ella beneventa distgargias fiscalas per persunas privatas, per famiglias e per interpresas. Areguard la politica da l'ambient pretenda ella che las resursas vegnian duvradas a moda durabla, refusa dentant il medem mument ina politica dal clima che sa basa sin la reducziun da CO2.
- Il slogan dal cumbat electoral da l'UDF è «La vardad oblighescha». Partidas e medias fetschian propaganda, crititgescha l'UDF. Ella refusa il «spiert woke» e l'ideologia da gender. Las mesiras da corona hajan dividì la societad. I dovria in'elavuraziun d'ina cumissiun independenta, pretenda la partida.
Per las elecziuns ha l’Uniun democratica federala fatg ina colliaziun da glistas cun la Partida populara Svizra.
Ils temas dals Grischuns libers ed independents:
- Engaschament per in Grischun progressiv ed ecologic.
- Dar ina vusch a las persunas senza partida.
- Tenor ils Grischuns libers ed independents duai l'interess principal dal Grischun esser projects d'infrastructura. L'integraziun dal traffic public en direcziun Turitg, ma er en l'Italia duai avair ina gronda prioritad.
Ils Grischuns libers ed independents han fatg ina colliaziun da glista cun la Verda, la Partida socialdemocratica ed ils Verd-liberals.