Set politicras e politichers po il Grischun trametter a Berna. Enfin uss gira in carussel cun otg nums. Sper ils nums dals cussegliers e las cusseglieras actualas vegn quel da l'anteriur cusseglier guvernativ Christian Rathgeb numnà.
La finamira da la Partida liberaldemocratica è da betg perder il sez ch'ella ha reconquistà il 2019. Sin quest sez sesa atgnamain la collega da partida Anna Giacometti.
Tuttina ditg sco Anna Giacometti politiseschan er Sandra Locher Benguerel e Jon Pult da la Partida socialdemocratica a Berna. Sco Locher Benguerel ha confermà annunzia la PS Grischun il decurs dal schaner co la partida sa posiziuneschia en vista a las elecziuns.
I fiss ina surpraisa sche betg tant Jon Pult sco er Sandra Locher Benguerel candidassan anc ina giada – er per che la Partida socialdemocratica vegn da tegnair ils dus sezs ch'els han recaltgà tar las ultimas elecziuns dal 2019.
La politicra da la Partida populara, Magdalena Martullo, ha gia confermà l'atun ch'ella cuntinuass gugent cun sia lavur en il Cussegl naziunal – en l'interess da la partida, dentant er dal Grischun.
Ed er Martin Candinas vul s'engaschar vinavant. Il 2023 è el president dal Cussegl naziunal. Durant quel onn veglia el servir al parlament sco president e suenter speria el da puspè dastgar cuntinuar cun sia politica sco «tut normal commember dal cussegl naziunal, speranza en l'ultima retscha», uschia Martin Candinas. Enfin uss n'haja el anc betg reussì tut sias finamiras. El veglia anc muventar insatge ils proxims onns.
Il politicher da l'Allianza dal center Stefan Engler che politisescha en il Cussegl dals chantuns veglia medemamain cuntinuar cun sia lavur, sco retschertgas da Keystone-SDA mussan.
Il segund represchentant grischun en la Chombra pitschna, Martin Schmid, fetschia gugent sia lavur a Berna – il pli gugent ensemen cun Stefan Engler.
Vis sur l’entira Svizra – enfin uss damain demissiuns
Cumpareglià cun las ultimas elecziuns naziunalas, il 2019, vulan sco i para dapliras e daplirs che sesan uss en il parlament a Berna er mantegnair quest sez. Enfin uss han 8 commembers dal Cussegl dals chantuns e radund 20 dal Cussegl naziunal annunzià lur demissiun, sco retschertgas da l’agentura da novitads Keyston-SDA mussan.
En la Chombra pitschna èn quatter da las tschintg fracziuns pertutgadas. Sulettamain nagin da l’Allianza dal center ha – fin uss – annunzià da vulair chalar. En la legislatura currenta ha bunamain la mesa Chombra gronda – 22 da 26 sezs – cumenzà da nov cun l’uffizi.
Main clera è la situaziun – il mument anc – en il cussegl naziunal. Intgins commembers ed intginas commembras n’han anc betg fatg transparent lur intenziun da vulair restar u da chalar. Er la Chombra gronda è dapi las elecziuns dal 2019 pli giuvna. 29 persunas n’avevan betg candidà anc ina giada ed a 31 ulteriuras persunas n’era la reelecziun betg reussida.
