Set persunas sesan per il Grischun en Chasa federala. E per gist trais dad ellas ha l'aventura politica naziunala cumenzà avant mo trais onns.
Uschia per Sandra Locher Benguerel e Jon Pult da la Partida socialdemocratica. Qua han ins bain gust da prolungar a Berna? Quai stoppia la partida decider, di Sandra Locher Benguerel.
Questas dumondas vegnan ussa discutadas, nus tuts essan en in process. La PS vegn a communitgar il cumenzament da l’auter onn co nus vegnin a sa posiziunar pertutgond las elecziuns dal parlament.
Ella saja dentant fitg gugent cussegliera naziunala per il Grischun, quai saja ina gronda onur ed era ina gronda responsabladad d'astgar gidar a furmar la politica a Berna. Ses collega da partida Jon Pult vesa quai sumegliant. I fiss dentant ina surpraisa sche betg omadus candidassan anc ina giada.
Pli avert communitgescha la liberaldemocrata Anna Giacometti sias ambiziuns. Ils davos trais onns sajan stads per ella in zic in emprendissadi, mo ussa sa sentia ella fitg bain en Chasa federala ed haja era pudì s'engaschar per ils interess dal Grischun e las vals dal sid.
Igl è fitg impurtant d’avair a Berna ina represchentanta dal Grischun dal sid, era ina che abita en quella regiun perifera e ch'enconuscha la problematica locala.
Ina legislatura pli ditg è Magdalena Martullo gia a Berna. Ed ella veglia era anc cuntinuar sia lavur en il Cussegl naziunal, tradescha ella.
La PPS sto exnum esser represchentada, era or dal Grischun. Gist per las regiuns champestras ed ils interess sco per exempel ils tschains d’aua e l’agricultura. Quai èn interess impurtants che la PPS represchenta ed jau sco interprendidra pos segir era contribuir mias atgnas experientschas.
Resta anc il «senior» dals tschintg represchentants grischuns en il Cussegl naziunal, Martin Candinas da l'Allianza dal Center. Senior betg pervia da sia vegliadetgna, el ha 42 onns, mabain perquai che quai è gia sia terza legislatura e l’onn che vegn è el era president da la Chombra gronda e cun quai il pli aut Svizzer. Na fissi lura betg era gist in bun mument da chalar, uschia sin il zenit da la carriera a Berna?
Tut mias finamiras n’èn anc betg reussidas. Sche jau patratg vid l’internet spert, la lescha da chatscha e quella da las segundas abitaziuns. Qua vi jau anc pudair muventar insatge ils proxims quatter onns.
Chalar veglia el cura ch’el haja cuntanschì sias finamiras e betg cura ch’el saja sin il pli aut post. Era gia prest 12 onns a Berna è ses collega da partida, il cusseglier dals chantuns Stefan Engler. En discurs na leva el anc betg tradir tge plans ch'el ha per ses futur.
Auter Martin Schmid, il liberaldemocrat che sesa sco segund represchentant grischun en la Chombra gronda. El sesia gugent en il Cussegl dals chantuns, di el.
Nus avain era gist temas sco l’energia e la forza idraulica ch’èn extrem relevants. Era il luf en il chantun Grischun. Jau avess grond plaschair sche la populaziun ma dess anc ina giada in mandat.
Ed il pli gugent faschess el quai ensemen cun Stefan Engler cun il qual el è vegnì elegì en il cussegl l'onn 2011. Els sajan in bun team sch'i giaja per ils interess dal Grischun, era sch'els na sajan en tschertas chaussas betg exnum dal medem avis.
Decisiun a l'urna
Vulair vulan pia tuttas e tuts. Da dretg a sanester sent'ins il grond desideri e la ferventa speranza da pudair, d'astgar cuntinuar cun la lavur a Berna. Il davos pled vegnan dentant las votantas ed ils votants dal Grischun ad avair. Quai en circa in onn, ils 22 d'october 2023.
