Da la vart parlamentaris e las parlamentarias grischunas vegnan cunzunt reacziuns positivas sin las elecziuns. Sandra Locher Benguerel, cussegliera naziunala per la PS, pensa ch'ils dus novs vegnan a reger en l'interess dal public. Ses collega da partida Jon Pult vesa l'elecziun sco in schanza per novs impuls per la Svizra.
Il cusseglier dals chantuns per l'Allianza dal Center Stephan Engler, ch'è stà dumbravuschs, vesa che Baume-Schneider e Rösti hajan omadus in segn ed ina sensibilitad per ils basegns da la populaziun rurala.
Albert Rösti ed il dossier d'energia
Martin Schmid saja fitg cuntent cun l'elecziun dad Albert Rösti, el enconuschia a Rösti or da sia lavur tar dumondas da l'electricitad u la forza idraulica. Cusseglier dals chantuns Martin Schmid spetga che Rösti viva la concordanza. El spera che Rösti metta ils accents spezialmain tar la politica d'energia.
Er Magdalena Martullo-Blocher ha grond gust da l'elecziun da ses collega da partida. Ella haja in stretga relaziun cun Rösti. Quel saja pragmatic ed haja gronda experientscha – cunzunt cun il dossier da l'energia. Ella spetga ch'el gioga là ina rolla en il Cussegl federal.
Ina nova cussegliera da lingua franzosa
Er l'elecziun dad Elisabeth Baume-Schneider vegn beneventada. Sandra Locher Benguerel manegia che la Giurassiana haja emprais da sa far valair sco minoritad en ses chantun. Ella enconuschia fitg bain ils dossiers. Ch'i vegnia stgars tranter Baume-Schneider ed Eva Herzog han Pult e Locher Benguererel spetgà, ina preferenza n'han els betg exprimì.
Anna Giacometti da la PLD ha accentuà che la decisiun avess era pudì crudar a favur da Eva Herzog, mo che la maioritad dal Parlament federal s’haja ussa decis per Elisabeth Baume-Schneider. Che las linguas latinas domineschian ussa il Cussegl federal saja ina gronda sensaziun. Quai na saja dentant nagin problem per ina tscherta perioda.
