Il chantun Grischun survegn passa 92 milliuns francs da la Banca naziunala svizra (SNB). Quella ha annunzià glindesdi ses gudogn definitiv da 26,3 milliardas francs per l'onn passà. Da quellas van, sco ils ultims onns, radund 6 milliardas en la cassa da la Confederaziun e dals chantuns. Sco il minister da finanzas dal Grischun Christian Rathgeb ha ditg envers RTR, haja il chantun budgetà cun pli u main questa summa. Ils 92 milliuns francs vegnian impundids per custs generals. Il chantun na po betg duvrar ils daners da la SNB per finamiras liadas.
Profità cunzunt da valutas estras
Tenor atgna communicaziun ha la Banca naziunala svizra profità cunzunt da las posiziuns da valutas estras. In terz – pia radund 2 milliardas francs van a la Confederaziun e las ulteriuras 4 milliardas vegnan repartgids sin ils chantuns. Suenter ils pajaments vegn la reserva da la banca naziunala anc a muntar a 102,5 milliardas francs. La BNS aveva gia publitgà la fin schaner in resultat provisoric da radund 26 milliardas.
Reservas vegnan augmentadas
La bilantscha da la Banca naziunala svizra è s'augmentada ils ultims onns pervi da las cumpras da devisas. Tenor las cifras las pli actualas èn quellas stadas fin la fin da favrer tar 938 milliardas francs. Per pudair absorbar er ina sperdita dira èsi la finamira da la banca naziunala d'avair ina bilantscha robusta cun avunda agen chapital. Quest onn vegnan fatgas reservas da total 95,7 milliardas francs.
