Cun grond brimbori è l’aczia dal sviluppader d’immobiglias e gestiunari d'hotels Orascom ida a la bursa il matg 2008. Davos Orascom stat la famiglia da l’investider egipzian Samih Sawiris. Da lez temp ha Sawiris empermess autas ratas da creschientscha sur plirs onns. Quai ha persvas blers – e l’emprim di da commerzi è l’aczia gist siglida sin 152 francs. Grazia a questa entrada a la bursa ha Orascom fatg in gudogn da 668 milliuns francs.
Dentant ha quest’unda da success be cuzzà curt temp. Curt suenter l’entrada a la bursa ha l’aczia be pli mussà en ina direcziun: engiu. Gia il 2017 è l’aczia d’Orascom crudada sut 10 francs. Il 2024 è l’aczia schizunt crudada sut 5 francs. Curt avant Nadal 2024 ha la famiglia da Sawiris annunzià da prender l’aczia da la bursa. Als investurs privats ha la famiglia fatg in’offerta da cumpra voluntaria: Per aczia datti anc 5 francs e 60 raps.
Investurs sa sentan cugliunads
Blers investurs privats han reagì vilads sin questa offerta. Cunzunt per investurs ch’han gia baud investì en Orascom, munta quella ina gronda perdita.
Naguib Sawiris, il figl dal fundatur d’Orascom e president dal cussegl d’administraziun, ha defendì il schaner 2025 envers il «Blick» l’offerta. Quella saja radund 40% sur il curs da la media dals ultims 60 dis da commerzi avant l’annunzia da l’offerta. Uschia, sco la bursa prescrivia quai. Investiders pertutgads crititgeschan dentant che la valur «reala» da l’aczia d’Orascom saja plitost enturn 30 francs. Tranter auter pervi da grondas reservas da terren en divers pajais che sajan valitadas fitg bass en la bilantscha.
Mai vegnida giu dal flatg
Tgi che persequitescha il svilup da la svieuta e dal gudogn d’Orascom constatescha che la firma n’è betg vegnida giu dal flatg dapi l’entrada a la bursa il 2008. Il 2023 (il resultat 2024 n’è anc betg avant maun) è la svieuta be stada pauc sur quella dal 2008 – e quai tar in gudogn pli bass.
Profità da l’entir exercizi ha percunter la famiglia Sawiris. La recumpra d’aczias custa ella uss gnanc pli 90 milliuns francs. En pli han ils blers investiders entant acceptà l’offerta. Uschia èn 97,5% da l’aczia d’Orascom en possess da la famiglia Sawiris.