Organisaziuns che porschan in dossier da pazients e pazientas electronic duain survegnir sustegn finanzial da la Confederaziun. Il Cussegl federal ha surdà la missiva correspundenta al parlament. Previs è ina contribuziun maximala da 30 francs per dossier, dentant mo sch'ils chantuns sa participeschan almain cun la medema summa.
Cun quella proposta vul il Cussegl federal promover la derasaziun dal dossier electronic, il mument ha be radund in promill da la populaziun in tal. En il dossier stattan tut las infurmaziuns relevantas per tgirar ina persuna. Custar vegn quel a persunas da la Svizra nagut. Persunas che na vulan betg in dossier, han da refusar activamain, uschiglio survegnan ellas automaticamain in.
