I cumenza gia tar la schelta: set differentas plattafurmas porschan la pussaivladad da far dossiers da pazients electronics, curt DEP. Ina part sin nivel regiunal, auters sin nivel surregiunal, tschertinas en scrit, autras online u ibrid e tuttas cun process d’annunzia differents.
I dovra anc in pulit sforz per ch'il DEP ha success.
Tenor Peter Peyer, il minister da sanadad grischun, saja sper la disfidanza e ch'il dossier electronic n'è betg propi enconuschent era in dals problems principals che l’access è anc fitg cumplitgà. El sez n’haja betg anc in dossier electronic gist per quest motiv.
Il problem è la lescha
La problematica è enconuschenta a Richard Patt, mainafatschenta da la Esanita, quella plattafurma che porscha ils dossiers electronics en la Svizra Orientala. Il problem saja dentant la lescha, di Richard Patt.
Per in dossier electronic dovri ina identificaziun digitala ed ina signatura fisica.
Ina revisiun da la lescha davart il dossier electronic da pazients saja en consultaziun. Quella prevesa sper in schlargiament da la purschida, per exempel sin apotecas, ed in dossier automatic per mintga pazienta e pazient, era ch’ina identificaziun digitala remplazza la signatura fisica.
Il pli tard sin la fin da l’onn – la consultaziun dura anc enfin ils 19 d’october – vul era la Esanita simplifitgar il process d’annunzia. Era ina campagna naziunala duai vegnir lantschada l’onn che vegn per sensibilisar la populaziun davart il dossier electronic.
