Ina da sias finamiras è il provediment d'energia segir per la Svizra. Sissum la glista d'urgenza dal provediment d'energia stettian las ovras da reserva, pertge il 2026 stoppian las actualas vegnir remplazzadas. Plinavant duain las fluctuaziuns da pretschs massivas sin il martgà d'energia vegnir restrenschidas. Malgrà che la Svizra haja approvà la lescha d'energia, saja la finamira da metter a disposiziun avunda energia – quai che saja ina cursa d'obstachels, uschia ha ditg Rösti. Cunzunt sch'i dettia recurs, pendian blers projects be vi d'in fil.
Evaluar l'interess tranter protecziun e niz pertutgant la biodiversitad
In'ulteriura finamira saja l'evaluaziun d'interess tranter protecziun e niz pertutgant biodiversitad – quai areguard a l'iniziativa da biodiversitad che va en votaziun ils 22 da settember. Tar quai vegnia il Cussegl federal a prender posiziun l'avust.
Il Uvek e la Confederaziun fetschian gia oz bler per la biodiversitad, ha Rösti aschuntà. Uschia possian ins in quart dal terren dal pajais attribuir a la biodiversitad. Uss giaja perquai da proteger e tgirar quest quart. Era sch'i dettia in Na a l'iniziativa vegnan ins ad agir en il rom da las pussaivladads finanzialas. La Svizra pudess er contribuir cun innovaziuns. Ins veglia uschèspert sco pussaivel deliberar la lescha da Co2, uschia che quella possia ir en vigur il 2025.
Er autos electrics duain contribuir al mantegniment da vias
Sco terz punct impurtant vesa Rösti l'infrastructura da las autostradas sco er da las lingias da viafier. Quellas vegnan finanziadas entras fonds, il fond d'agglomeraziun ed il fond d'infrastructura da viafier. Per pudair segirar las finanzas, dovria tenor Rösti novas mesiras legalas. Uschia duain a partir dal 2023 er ils autos electrics vegnir involvids. Per quai dettia differentas variantas, per exempel taxas sin la retratga d'energia electrica u taxas tenor kilometers. Ina consultaziun saja en planisaziun. Ma questas taxas per vehichels electrics duess vegnir fatg pass per pass e precaut, pertge che uschigliò vegniss fatg encunter a la derasaziun da quels vehichels, ha ditg Rösti.
