Il bel crap u il vasch da flurs na paran betg pli dad esser la metoda preferida per zuppar las clavs. Oz en moda èn plitost las cassettas per clavs che permettan in access simpel ed apparentamain segir ad in'abitaziun.
Mo: En l'internet chatt'ins blers videos che mussan sco rumper si questas cassettas. «Cun utensils dal mintgadi po quai vegnir fatg en paucas minutas. Jau poss prender la clav, svidar l'abitaziun da mes vischin, remettar la clav a ses plaz e nagin na vegn a savair che jau sun passà», declera Pierre Loup, tecnicist da tresors tar l'interpresa CBL, sin dumonda da l'emissiun dad RTS 19h30.
Vendita crescha
Il pretsch da questas cassettas per clavs variescha tranter 20 e 40 francs e po muntar fin a 200 francs per models connectads. Las cassettas pli charas n'èn dentant betg pli segiras. «Ellas vegnan ad esser tuttina simplas d'avrir. L'unica differenza è ch'in model connectà As vegn ad infurmar cura ch'el vegn avert», accentuescha Pierre Loup.
L'onn passà ha il commerzi online Digitec Galaxus vendì dieschmillis cassettas per clavs. Tranter 2021 e 2024 è la vendita en Svizra s'augmentada per 170%.
Mesiras da segirezza
En il chantun Vad visita la polizia persunas privatas per dar cussegls da segirezza. Sche tut questas cassettas pon vegnir ruttas si, è il meglier mied da sa proteger cunter enguladitschs da tscherner in bun lieu.
«Ina cassetta per clavs sto vegnir zuppada en in lieu segir e protegì. Il code sto regularmain vegnir midà, i na dastga betg vegnir laschà num u adressa sin la clav e sch'ins na drova betg: betg laschar ina clav en la cassetta», declera Christian Bourquenoud, incumbensà da prevenziun tar la polizia chantunala dal Vad.
Igl è er impurtant da controllar il contract d'assicuranza. Tut tenor las circumstanzas n'è la surpigliada da donns numnadamain betg garantida.