Quest'emna entschaiva en il Vallais la chatsch'auta. Tranter il Pass dal Furca ed il Lai da Genevra van lura puspè var 2000 chatschadras e chatschaders a chatscha. E cun in pau fortuna fan els preda – e pon sa legrar da lur fortuna da chatscha.
Perquai boicotteschan mazlers selvaschina vallesana
Ma ils animals sajettads ston lura er vegnir en mazlaria e vegnir stagliads. Quai fan savens mazlers da professiun. Ma adina dapli dad els refusan d'acceptar selvaschina sajettada. La lavur saja memia gronda.
Memia blers sajets n'hajan betg tutg ils cors dals animals. «Savens han animals sajets en il venter, lura sa reparta il cuntegn dal magun en il corp. Quai n'è betg ina bella lavur», di il president da las mazlarias e dals mazlers vallesans, Willy Stocker. La charn vegn uschia contaminada e sto vegnir tagliada davent. Quai che vilenta puspè las chatschadras ed ils chatschaders.
In problem saja che chatschadras e chatschaders na tutgian betg endretg ils animals – quai capitia adina dapli il davos temp. 70% dals chatschaders sajan bain fitg buns. Ma: «Ils auters fan tut en paglia», recloma Stocker. Tar sajets nunprecis na vegnan animals betg mazzads directamain e ston patir – e la charn vegn tschufragnada. Chatschadras e chatschaders sajettian mintgatant, era sch'els n'han betg precis en mira l'animal. «Oz èn simplamain memia blers chatschaders d'enturn – e memia pauca selvaschina», di Stocker. Chatschadras e chatschaders pajan en il Vallais mintg'onn passa 1'300 francs per la patenta da chatscha, per dastgar ir a chatscha da tschiervs, chamutschs e chavriels.
Chatschaders sa dostan
Il boicot agita ils chatschaders vallesans. Marc Truffer, il president da l'uniun da chatschaders dal Vallais, na chapescha betg daco che blers mazlers n'èn betg pli pronts da prender encunter selvaschina.El refusa la reproscha, ch'ils chatschaders sajettian en general mender. In mazler na possia betg giuditgar quai. «Ils mazlers vesan mo ina pitschna part dals animals sajettads.» La gronda part dals chatschaders e da las chatschadras schluppettian bain – uschia ch'ils mazlers la pudessan lura er prender dapart bain ils animals.