Jean-Charles Roulin è stà da 1989 fin 2006 sacerdot. Durant quest temp ha il Friburgais ademplì ses engaschament religius cun passiun. Ma cun il temp è la solitariadad dal celibat daventada memia greva per el.«Betg mintgin è fatg per viver il clom al celibat (...). Jau na savess betg dir che jau sun stà clamà al celibat, ma ins sa senta clamà da daventar spiritual, pratitgar in uffizi, prestar lavur pastorala. Nus savain tge ch'i munta per la baselgia catolica d'esser celibatari (...) Ma il celibat è insatge che duess restar ina schelta», di el a «Mise au point» da la RTS.
Avant in pèr onns è sia vita vegnida messa sin il chau cura ch'el ha emprendì d'enconuscher Tina, ina catolica ferventa, mamma suletta ed oriunda da l'Argentina. Lur amur è naschida en baselgia, Tina en il banc e Jean-Charles davos l'altar en ses vestgì sacerdotal.Lezza giada guardava Tina Rospide Roulin ils sacerdots sco umens tranter Dieu ed ils cartents. Ella n'avess mai pensà ch'ella s'inamureschia en in um da la baselgia.«Jau n'hai mai vis Jean-Charles sco um, perquai che jau resguardava el sco sacerdot. Da quel temp na ma sentiva jau betg bain cun quai, e propi era jau fitg ditg cun el en ina relaziun formala. En baselgia al numnavan tuts 'Jean-Charles', ed jau l'hai numnà 'Mon père'. Mintga giada pudev'ins vesair ch'i marschava insatge, ma jau na vuleva betg vesair quai», declera ella.
Envidà da far la pregia
Malgrà lur via restan Jean-Charles e Tina fidaivels a la baselgia. Avant intgins mais è il consort schizunt vegnì envidà d'in anteriur collega da pregiar durant l'emna sontga, insatge ch'è atgnamain scumandà ad el.«Jau steva davant ina radunanza ed empruvava da parter mia cretta e l'evangeli. Quai m'ha fatg fitg bain», confessa el.
Per sia dunna è quest return davos l'altar stà chargià emoziunalmain. «Jau hai bragì. Cura che nus avain bandunà la baselgia è la glieud vegnida tar el ed ha ditg: «Igl è surprendent, tge che ti has ditg, ti fas bain a nus.» Jau ma sun dumandada: Pertge, Dieu, na po el betg far quai vinavant?»Jean-Charles Roulin respunda: «Ma jau fatsch vinavant, ma insanua auter. Quai ha pussibilità a mai da chattar in senn per il rest da mia vita, per mia vita da famiglia. Jau ditg quai en il preschent: Jau sun sacerdot. Per mai è quai ina part da mia istorgia, part da mia identitad. Ma jau hai prendì ina decisiun, nua che jau sai che jau sun sclaus dal servetsch. Quai vegn a sa midar in di. Jau na sai betg sche jau vegn a vesair quai, ma jau sun detg ruassaivel.»
In'amur secreta
Marc Fassier è stà da 2004 fin 2021 sacerdot en la diocesa da Saint-Denis datiers da Paris. L'onn 2018 è el s'inamurà en Ingrid, ina commembra ch'el ha emprendì ad enconuscher durant il battaisem da ses ultim uffant. Svelt è sa sviluppada ina relaziun plain fidanza ed amicizia avant che l'affera è daventada ina affera d'amur secreta.«In di m'ha Marc supplitgà da vegnir en il presbiteri. Cura che jau al vuleva bitschar per dir adia, al hai jau bitschà sin bucca», sa regorda Ingrid Looten Marienval.Per Marc èsi stà in mument da la vardad: «Jau pens ch'igl è stà l'ultim dagut che m'ha pussibilità da dir a mai sez «Ti has il dretg d'amar e da vegnir amà», declera el.
«La sexualitad è dapertut»
Quindesch onns è Marc Fassier restà cast. Ma bainprest ha el scuvert che bleras da las persunas religiusas enturn el avevan ina vita sexuala. Quai è stà l'entschatta da vesair pli cler il mund da la baselgia.
Jau vuleva viver insatge saun ed uman
«Pli lunsch che jau sun vegnì e pli fitg che jau hai scuvert che nus ans chattain en in mund iperexualisà cun betg discurrer da quai cun tegnair secret. La sexualitad è dapertut, nus stabilin in sistem malsanadaivel ed jau vuless viver insatge saun ed uman», declera el.
Direct cunter l'instituziun!
Dus onns han Marc ed Ingrid vivì quest'affera d'amur secreta. Il pèr saveva ch'il sacerdot vegnia prest a sortir dal clerus. L'onn 2021 vegnan els la finala denunziads entras ina brev anonima. Marc vegn cità da ses uvestg.«El m'ha ditg: «Ussa datti trais cundiziuns: ti stos s'allontanar geograficamain dad ella; ti stos garantir che ti sajas propi liber dad ella; e ti stos avair sustegn psicologic.» Jau chapesch ch'el ma vul chastiar, jau ma sent culpabel e vul proteger l'instituziun», di Marc Fassier.
El cuntinuescha: «Jau hai midà mes curs ed hai ditg che jau na vegnia betg mo a prender per mauns quai, mabain era direct l'instituziun. En in tschert senn vegni ad esser in act militant.»L'um da 40 onns è la fin finala vegnì suspendì da tut ses uffizis, era a l'institut catolic de Paris nua ch'el instruiva.
El banduna sia dunna en speranza per la baselgia
En intgins cas va la baselgia perfin anc pli lunsch cun il celibat. Encuraschà tras in guid spiritual ha Didier Berthod bandunà cun 25 onns sia partenaria ch'era en speranza pir paucs mais per sa deditgar cun corp ed olma a la religiun en ina claustra en il Vallais.«Davent dal mument che jau sun vegnì clamà da Jesus hai jau pudì ma prestar quai. Ins di ch'ins haja il dretg da bandunar dunna ed uffant per esser in discipel, quai ha confermà in sacerdot. El m'ha ditg: «Dieu po manar umans uschia. I vegn a capitar, jau sun segir che la mamma vegn a sa metter a pèr e tia figlia vegn ad avair in bab», declera Didier Berthod che vegn ordinà il 2018 suenter in decenni vita monastica sco sacerdot.
Ina segunda schanza
Trais onns suenter ses vut svanescha tut la tschertezza da l'anteriur alpinist e spezialist da fessas. El decida da puspè s'unir cun ses passà e cun sia figlia e sia ex-amia en il Canada. La lunga separaziun n'impedescha betg, che l'amur che s'inflamma bainbaud puspè.
«Ina segunda schanza sco quella na survegn nagin», conceda il Vallesan che po esser ventiraivel da pudair renovar ina relaziun amuraivla cun la mamma da sia figlia e da pudair reprender ina relaziun cun ses uffant ch'el n'ha avant anc mai vis.
La sexualitad e la vita zuppada dals sacerdots ston vegnir sin maisa
«Il medem temp hai jau bandunà mes pajais, jau hai bandunà mes continent. Jau n'hai gì nagina lavur pli, jau hai gì dapli che 40 onns. Ma jau hai sentì ch'igl è stà fitg curaschus, ch'igl è stà gist e ch'i vegniss bun.»
Oz èn Didier Berthod, sia partenaria e sia figlia ina famiglia. L'anteriur sacerdot accepta ses passà, crai dentant che la baselgia stoppia sa midar. «I dat problems en il catolicissem, sco quai che mia istorgia mussa. Sexualitad, la vita secreta dals sacerdots e la posiziun da las dunnas ston vegnir messas sin maisa», concluda el e supplitgescha la Baselgia catolica d'adressar il problem.