Sco motiv han ellas inditgà da na betg vulair cofinanziar il studi d'abus da la baselgia catolica. Quai ha publitgà il «Tages-Anzeiger». La conferenza da las uniuns dals urdens religius sa participescha numnadamain als custs dal studi d'abus. Las claustras da dunna han plinavant manegià da uschè u uschia n'avair nagins daners per il studi.
Constat l'argumentaziun da las mungias ch'ellas sezzas sajan pertutgadas?
Tendenzialmain: Gea. Rapports da mungias ch'èn vegnidas violadas da lur confessur èn d'udir pli savens dapi che violenza sexualisada en il conturn da la baselgia catolica vegn tematisada publicamain. Il cas il pli conuschent è bain quel da l'anteriura mungia Doris Reisinger. Era il studi preliminar da l'abus sexual en Svizra mussa cleramain, che violenza sexuala vi da mungias è capitada en Svizra. Ma i dà er delinquentas tranter las mungias. Per exempel en ina chasa d'uffants da las mungias dad Ingebohl. I dat pia era motivs che pledan per ina participaziun da las claustras per dunnas a l'elavuraziun.
Èn las mungias en Svizra propi uschè paupras sco ch'ellas dian?
I dat bleras claustras da dunnas en Svizra che n'han praticamain naginas entradas, abstrahà da donaziuns e da l'AVS da las mungias pli veglias. Ils ultims onns èn stalivadas bleras funtaunas d'entradas: las mungias han stuì chalar cun las scolas che tutgan a la claustra u las commembras da la claustra èn uschè attempadas ch'ellas na fan strusch pli products per la vendita (sco per exempel itgs u surcusidas. Vitiers vegn che las dunnas en las claustras èn savens scoladas main bain che lur collegas masculinas che han per regla studegià teologia e cun quai meglras pussaivladads da gudogn.
Tge custa il studi a las claustra?
Il studi davart la violenza sexualisada en la baselgia catolica custa 1.5 milliuns francs. Da quels pajan las claustras – umens e dunnas ensemen – diesch pertschient. Areguard dal grond dumber da claustras ch'i dat anc adina en Svizra stuess quai esser pussaivel da pajar. I va a las claustras da dunnas era per il messadi: «A nus è vegnì fatg donn e nus na pudain e nu vulain betg cofinanziar l'elavuraziun.» Quest messadi ha senz'auter sia giustificaziun.
Tge consequenzas ha la refusa da las mungias?
Il studi na vegn betg ad esser periclità pervia da quai. Tut en tut han claustras ed urdens en Svizra avunda daners per pajar lur contribuziun. Tge che quai vul dir per il renum da las claustras da dunnas è grev da dir. La discussiun davart il studi da l'elavuraziun en la baselgia refurmada ha mussà che la publicitad n'è betg propi pronta da differenziar areguard il tema abus. Tgi che na sustegn betg l'elavuraziun stat spert en la critica, era sch'i dat buns motivs persuenter.