Ils blers ospitals en Svizra sa chattan en difficultads finanzialas e fan perditas. In problem che sa mussa dapi onns ed è s’accentuà durant la pandemia da corona, malgrà ch’il dumber da las instituziuns che porschan in provediment da basa va cuntinuadamain enavos.
L’inflaziun ha be anc pegiurà la situaziun, damai ch'ils ospitals na pon betg adattar lur taxas als pretschs creschents. Consequentamain èn intgins indrizs vegnids serrads, auters han duvrà ulteriurs daners dal stadi e reducì persunal.
Milliuns per l'ospital chantunal a Friburg
In exempel è l'ospital chantunal da Friburg che fa dapi il 2016 perditas ed ha debits da passa 60 milliuns francs. La structura ha instradà ina reorganisaziun, ma il chantun sto anc dar sustegn finanzial, sco SRF declera .
Il parlament chantunal ha dà glisch verda per ina garanzia sur 100 milliuns ed in emprest da passa 70 milliuns francs per las investiziuns las pli urgentas, ma il davos pled han ils burgais che vegnan a votar ils 9 da zercladur en chaussa.
La staziun intensiva d'uffants a Cuira
Bunamain vegnida serrada è la staziun intensiva per uffants e novnaschids a Cuira. La smanatscha da quai ha manà ad ina mobilisaziun da la populaziun: passa 30'000 suttascripziuns per mantegnair il provediment da l'ospital chantunal grischun èn vegnidas rimnadas. Cun engaschi dal chantun è il servetsch vegnì salvà. Ma i dovra anc adattaziuns – tut tenor custusas.
10'000 francs dapli en il Tessin
Bler da discutar en il Tessin ed utrò ha procurà il cas da la vendita da stimulaturs dal cor, dals quals il pretsch po variar da chantun a chantun per 10'000 francs.
In cas,
uschia la RSI
, mussa il sistem fitg nunsurvesaivel dal martgà da products medicinals, il qual vegn opponì quasi unanimamain da la politica.
L'animaziun da medis giuvens
Ed anc in ulteriur problem sa mussa tar il sistem da sanadad svizzer: In terz dals students da medischina vul sortir da la professiun suenter l’emprima experientscha pratica. Quai pervia da las cundiziuns da lavur, sco RTS raporta . Mancanza da contact uman, lungas sururas ed il temp che vegn impundì per incumbensas administrativas empè da pazients, laschan svanir en blers cas l'entusiassem.
Chatscha da persunal a l'exteriur
La Svizra ha er ina dals pli auts dumbers da persunas en la tgira en relaziun cun la populaziun, circa il dubel da la media dals pajais da l'Organisaziun da cooperaziun e svilup economic (OECD).
A medem temp pateschan ils ospitals d’ina mancanza da persunal qualifitgà, uschia ch’els guardan savens sur il cunfin or. Sco ch’in rapport da swissinfo.ch mussa, datti in’offensiva dubla per far frunt a la situaziun: augmentar la scolaziun e meglierar las cundiziuns da lavur. I vegn dentant a durar in tschert temp fin che quai porta fritg, entant ch'ils custs da sanadad èn anc adina in grond problem per las abitantas e per ils abitants da la Svizra.