Sin plaun federal han quai cumenzà tranter auter tras il postulat da Thierry Burkart cusseglier dals chantuns e president da la PLD Svizra da la fin da settember 2023. Il postulat, acceptà l'entschatta mars dal Cussegl dils chantuns, dumonda al Cussegl federal da far in rapport per sclerir da nov las «pretensiuns faussas» da sia strategia d’energia 2050 e la «posiziun centrala da l’energia nucleara» en il «mix d'energia da la Svizra», sco ch'i vegn menziunà en il postulat.
Tge pensais Vus da quai? Discutai cun l’entira Svizra via «dialog», ina purschida da la SRG SSR.
L'iniziativa «Stop al Blackout»
L’iniziativa «Stop al blackout» pretenda che la Constituziun federala vegnia midada en quel senn che «mintga furma da la producziun d’electricitad favuraivla al clima (è) permessa». In artitgel che fixass la libertad d’interpresa absoluta en il sectur da la producziun d’electricitad, uschè ditg che las tecnologias n’èn betg fossilas, en la constituziun. Davos la lescha stat l’idea da revegnir a la votaziun davart la sortida da l’energia atomara da l’onn 2017 – cura che 58% da las Svizras e dals Svizzers èn stads en favur da la nova lescha d’energia.
Tenor l'avis dal champ burgais e d'ina part da l'economia èn questas mesiras necessarias, perquai che l'energia nucleara saja indispensabla per la segirezza energetica da la Svizra e per sia strategia cunter il stgaudament dal clima.
Ma...
Ma i dat blera opposiziun, cunzunt da vart sanestra. Blers experts dian ch'ord vista tecnica saja l’installaziun da novas ovras electricas in process stentus, ch’ellas na possian betg vegnir messas en funcziun avant l’onn 2050 e ch’i existia in grond ristg tecnic.
Plinavant sa nuspescha ina part dal sectur d'energia dal puntg da vista economic d'investir en l'energia nucleara. Ella saja memia chara en cumparegliaziun cun las energias regenerablas ed ella saja nunrentabla a lunga vista pervi dals custs per il manaschi e per la dismessa da ruments.
E la finala s'opponan las partidas da las protecturas e dals protecturs da l'ambient a l'energia nucleara pervia da la dumonda dal dismetter ils ruments radioactivs.
In tema che na pertutga betg mo la Svizra
Suenter l'accident a Fukushima ha il Giapun puspè mess en funcziun ses reacturs, entant ch’auters pajais (surtut la China, l’India e la Russia) construeschan, planiseschan (sco la Pologna, la Rumenia e la Corea dal sid) u engrondeschan lur implants (la Frantscha, la Belgia e la Finlanda).