Tranter l'adrenalin da stortarolas, viadis en bists idillics ed en balluns ad aria chauda porscha l'Europapark a ses visitaders er ina dimensiun spirituala che n'è savens betg enconuschenta. Nozzas, spusalizis e battaisems èn quotidianas en il parc a l'ur da la Svizra. «Mes um ed jau avain ina colliaziun fitg stretga cun l'Europapark. Qua ans essan nus spusads ed avain fatg qua nossas fotografias da nozzas. E dapi che nus ans enconuschain, vegnin nus almain ina giada l'onn», raquinta ina giuvna pèr tudestg a la televisiun RTS. Per ella èsi mo stà natiral da battegiar là ses uffant: «Igl ans ha signifitgà fitg bler ch'il battaisem da noss uffant ans ha pudì liar anc pli stretgamain cun noss lieu preferì.»
Il spiritual catolic Thomas Schneeberger ha fatg la ceremonia. Igl è il quart batten quest'emna en la chapella «St. Jakob». Thomas Schneeberger fa era benedicziuns da nozzas per persunas ch'han ditg «gea» avant blers onns. «Gist ier avain nus gì ina benedicziun per in pèr ch'ha maridà avant 50 onns», di el.
Fundaturs fitg religius
Sper las ceremonias religiusas intervegnan ils pastorals dal parc era per ils emploiads e visitaders per lur giavischs e basegns spirituals. «Nus avain era la baselgia norvegiaisa, entamez dal parc, en la part scandinava, e la pitschna chapella Brooklyn, la pli veglia.»
La famiglia Mack, proprietaria dal terrain e profundamain religiusa, ha integrà la dimensiun spirituala en la construcziun dal parc da divertiment. Uschia n'èn las baselgias betg mo elements decorativs, mabain era chasas da Dieu activas nua che nozzas e battens vegnan celebrads. Dapi il 2005 benedeschan pasturs era tut las novas attracziuns e tut ils hotels.
In spiritual svizzer
In dals pasturs dal parc è Svizzer. Adrian Bolzer è da l'avis che quai ch'els fan è impurtant: «Qua avain realisà il siemi da l'unitad europeica e quai ma para essenzial, perquai che quai n'è betg il cas en la politica». Per el èsi era impurtant che la glieud possia vegnir en il parc, possia deponer ils quitads a l'entrada e ch'els «possian giudair la vita, er en quests dis da guerra e crisa». E sco che Adrian Bolzer ans sincerescha è il parc bain in lieu da consum, ma el ha era in'olma. Il proprietari Jürgen Mack conferma: «Per nus sa chapeschi da sasez ch'era qua sto esser preschenta la cretta cristiana.» En ses egls è la preschientscha da spirituals en il parc in plus per collavuraturs e per ils visitaders.