«Schambun è definì cleramain», di il chemicist chantunal Matthias Beckmann, responsabel per ils chantuns Grischun e Glaruna. «Il schambun è atgnamain in schambun davos e sto vegnir differenzià cleramain dal schambun da spatla.» Sut schambun curseschan er schambun da purs, schambun da cuschinar e schambun da model, dentant er schambun criv.
En la gastronimia datti bleras midadas da persunal. Quai fa grev da mantegnair ina cuntinuitad.
La prova da controlla tar 32 manaschis da gastronomia ha mussà ch'in terz da las ustieras e dals ustiers ha declerà fauss lur schambuns. «En in cas èsi cleramain engion, perquai ch'il restaurant aveva declerà charn da galdin sco schambun.» Ma era sche la faussa decleraziun è vegnida fatga, sco en auters cas, eventualmain pervia da nunsavida, saja quai in engion dal consument.
«Tutto bene» tar pizzarias
Da set pizzerias controlladas hajan sis dumagnà la controlla, declera il chemicist chantunal Beckmann al magazin da consuments «Espresso» da SRF. Prosciutto u pia schambun sco ingredienza haja be in'interpresa declerà faussamain.
Tar blers auters restaurants nua ch'ins ha constatà irregluaritads saja il motiv per la faussa decleraziun probabel savens nunsavida, suppona il chemicist chantunal. «En la gastronomia datti fitg bleras midadas da persunal. Quai fa grev da mantegnair ina cuntinuitad.»
«Branscha vegn confruntada cun adina dapli sfidas»
Gastrosuisse, l'associaziun da las interpresas da gastronomia, scriva areguard l'examinaziun actuala che las obligaziuns da decleraziun vegnian a s'augmentar cuntinuadamain en la gastronomia. E: «Pli bleras prescripziuns che la Confederaziun fa e pli grev ch'i daventa surtut per manaschis pli pitschens da garantir decleraziuns correctas.»
Uschia resta vinavant ina incumbensa impurtanta per las chemicistas ed ils chemicists chantunals da guardar sin la detta ad ustieras ed ustiers.
