L'Uffizi per la segirezza da victualias e per la sanadad d'animals controllescha las radund 3'000 ustarias ch'i dat en Grischun e Glaruna. Las controllas da victualias da l'onn passà mussan ch'i dat anc potenzial tar la schubradad. 271 da 1'033 provas n'han betg ademplì las pretensiuns d'igiena.
Mintga quarta prova è stada manglusa. Quai n'è segir betg in bun resultat.
Controllas dettia cunzunt là nua che la situaziun saja delicata, per exempel pervi da la producziun u conservaziun da mangiativas, ha il chemicher chantunal Matthias Beckman declerà envers SRF. Substanzas nuschaivlas per la sanadad n'hajan las provas betg cuntegnì, sco il chemicher chantunal ha ditg vinavant.
Er sche il resultat da las controllas d'igiena sajan da cumparegliar cun ils quels dals ultims onns, saja giavischaivel che la situaziun sa meglierescha. Crap da stgarpitsch saja sch'i dettia savens midadas tar ils gastronoms sco er la mancanza da persunal qualifitgà.