La fasa da test per duvrar e-voting è in pass vinavant. Il Cussegl federal ha deliberà, respectivamain prendì per enconuschientscha la nova basa legala. Emprovas da votar a moda electronica na spetgan ins dentant betg avant il 2023.
L'ordinaziun midada davart e-voting sco er la revisiun parziala da l'ordinaziun davart ils dretgs politics vegn en vigur a partir dal prim da fanadur 2022. Sin fundament da questa basa pon ils chantuns puspè dumandar la Confederaziun da porscher e-voting en rom da la fasa da test. Ultra da quai è il dumber da las votantas e dals votants che dastgan participar als tests limità sin maximalmain 30% tar votaziuns chantunalas e 10% tar votaziuns federalas.
Da nov duaian be pli vegnir autorisads sistems da votaziun verifitgabels, quai tras expertas ed experts independents.
Offensiva da furmaziun en la tgira
La furmaziun a la persuna responsabla per la tgira duai vegnir promovida durant otg onns cun fin ina milliarda francs tras la Confederaziun ed ils chantuns. Uschia spera il Cussegl federal da pudair cuntrafar a la mancanza da persunal da tgira. L'offensiva da furmaziun duai cumenzar uschè spert sco pussaivel. Sco model figurescha ina part da l'iniziativa da tgira ch'il pievel svizzer ha acceptà il november da l'onn passà. La nova offensiva prenda si las mesiras da la cuntraprosposta indirecta a l'iniziativa. Il Cussegl federal ha deliberà il project da votaziun per mauns dal parlament.
Las votaziuns dal settember
Ils 25 da settmber vegnan quatter fatschentas davant il pievel:
- Il referendum encunter l'auzar la vegliadetgna da rentas da las dunnas sin 65 onns,
- l'auzament da la taglia sin plivalur a favur da l'AVS,
- l'iniziativa davart l'allevament intensiv
- ed il referendum per dismetter parzialmain la taxa anticipada.
Nagina 13avla renta
Il Cussegl federal refusa ina 13avla renta d'AVS che l'iniziativa dal pievel «Per ina meglra vita en la vegliadetgna» pretenda, sco gia annunzià il november. Uss ha il Cussegl federal deliberà ses messadi per mauns dal parlament. El na vesa nagin spazi d'agir finanzial per realisar ina 13avla renta d'AVS. Ultra da quai vegnissan retschaviders d'ina renta d'invaliditad u da survivents dischavantagiads. Perquai preferescha il Cussegl federal las refurmas actualas dal provediment da vegliadetgna.
Promover pasch en il cussegl da l'ONU
Sche la Svizra survegn ina plazza temporara en il Cussegl da segirezza da l'ONU vul il Cussegl federal esser preparà. Uschia vul el promover la pasch, proteger meglier la populaziun civila en guerras ed affruntar la midada dal clima. In'ulteriura finamira fiss da promover la transparenza en l'ONU. Quai ha communitgà il Cussegl federal. Sco proxim pon las cumissiuns da la politica da l'exteriur dal parlament prender posiziun. La Svizra candidescha ils 9 da zercladur per vegnir per dus onns en quest gremi.
