Scumandar simbols extremistics vul il Cussegl dals chantuns. Senza opposiziun ha la chombra pitschna approvà la moziun da sia cumissiun per dumondas giuridicas.
Il Cussegl dals chantuns vul dar l'incumbensa al Cussegl federal da stgaffir ina basa legala per il scumond. Il scumond pertutgass meds da propaganda naziunalsocialistics, dentant betg mo quai. Er simbols e parolas che discrimineschan las razzas, glorifitgeschan violenza u l'extremissem duain esser scumandads.
Il Cussegl naziunal ha votà per ina moziun ch'ha pertutgà sulettamain simbols e parolas naziunalsocialistics, quella ha il Cussegl dals chantuns dentant renvià, e vulì in scumond pli general.
Dretgs umans u dretg d'exprimer
I saja impurtant da far la discussiun, dentant betg mo davart simbols naziunalsocialistics, mabain era sur dad autras furmas d'extremissem, dian ils dus cussegliers dals stadis grischuns Martin Schmid e Stefan Engler. Entant che per Stefan Engler èsi clar che ils dretgs umans stattan avant il dretg d'exprimer, è Schmid pli sceptic. I saja difficil da chattar ina definiziun per ina lescha che po vegnir utilisada finalmain en la pratica.
Martin Schmid e Stefan Engler han discutà la moziun da la cumissiun da dretg sco commembers da tala. Quella recumonda da dir Gea a la moziun senza cuntravusch. Il Cussegl dals stadis debattescha mesemna sch'i vulan ch'il Cussegl federal elavura in sboz d'ina tala lescha u betg.
